V’là dès miles et dès razans, nosse planète a skèpî d’one caboucherîye qui nos n’avans jamais ètindu po sclater totes lès lumerotes do stwèlî.
Il a co falu dès miles et des razans d’ pus, po qu’ dès sûtis d’audjoûrdu sayenuche dè l’ comprinde et wadjî d’ssu lès chances di trover l’ fin mot.
Tot l’ monde sét bin audjoûrdu qui tot ç’ qu’ègzistéye èst faît avou dès-atômes èt qui zèls minmes sont faîts avou dès tos p’tits-élèctrons, qui balzinenut sins r’lache autou d’on niyau, one miète come lès planètes autou dè l’ solia. Ci n’èst nin tot-à-fait come ça, mins ci n’èst qu’ po vos mostrer l’imaudje.
Quand on r’mèt lès bèrces aux nids dins lès bouchons, qu’on rawaîte lès imaudjes au d’triviès d’on microscope aus cènes qui l’ nasa trove avou leû télèscope Uber, vos n’ sarîz fé autrumint qui d’yèsse djondu pa li r’chonance dè l’ pus p’tit atôme di vosse cwârp avou l’ grandeûr di c’ qu’i s’ passe dins li stwèlî.
Èstant gamin, nos-alîn’ à l’ côpe au bwès avou nosse pas, abate dès-aubes à l’ ricèprèce, sôyî lès buks à bwaches, rèdjaurber lès coches à fagots d’ssur one gate. Li pus plaijant d’ noste ovradje c’èsteût d’ ramasser les cochètes, lès lègnes, qui nos ramoncelîn’ à vèyates po nos p’lu r’tchauffer, èt cure nos canadas dins lès breûjes.
I n’ faut qu’ deûs pîres qu’on bat èchone po trover l’ fè. I n’ faut qu’one tote pitite sipite po-z-alumé on fè d’ diâle. Razoûyîz bin vosse fè ; lès blouwès flames les pus tchôdes mougnenut l’ bwès, i reûpléye. Lès rodjès flames si solèvenut avou lès fumêres èt lès scrabîyes pour s’aler piède dins l’ bèrdèladje dè l’ vint. Comint n’ nin r’mète ça à ç’ qui Uber (NASA) nos mostère.
Asteûre, dji m’ vos va dîre li mène : su nosse têre, on s’ cotape à non scyinse come one banseléye di molons. I nos faut d’mèrer tot simpe. Nos-èstans si télemint p’tit qui n’ vikans su l’ pus p’tite dès scrabîyes.
Rimètoz on dêrin côp tot ça à c’ qu’i s’ passe dins li stwèli.
Li scrabîye èwou qu’ nos vikans, ci sèreût bin nosse solia. Èt l’ ci qu’èst l’ pus prèt dè l’ nosse, i faureût d’djà min.ner rwèd, dès anéyes au long à l’ vitesse dè l’ lumîre, po l’ trover.
Çi n’èst nin possube di s’ fé one idéye dè l’ grandeûr qui l’ fè qu’a stî alumé dwèt awè. C’èst co bin pus sbarant di s’ fé one idéye dè l’ grandeû dès mwins qu’ont d’vu buké lès cayaus d’èwou qui l’ blawète à potchî.
Gn’a-t-i vormint one sakî padrî tot ça. Èst ç’ qu’i lès cayaus, ont tchaît foû d’ sès mwins pace qu’il aveût l’ balzin ? Dins tos lès cas, si vos l’ rèscontroz on djoü, ni v’noz nin mè l’ prusinter. Dji n’ sâreû nin mi r’mète à l’ plus p’tit d’ sès-atomes. Èt portant, dj’ènn’a come lî, mins ci n’èst nin lî, grand au d’là, qui s’ va trècassî d’one faflote achide dissu one sicrabîye qui s’ rafrwèdît.