C’èst l’prétimps ! Mon djeu todi, li solê a rivenu. Adon, ci n’èst nin one crake ! On pinséve qu’il èstéve mwârt maîs dji l’a vèyu passè…
Èt il a pris tot s’timps, causu one eûre po fè les deûs-cints mètes do l’voye à pids…
C’côp-ci, c’èst vraîmint one bone novèle èt dji va ièsse tote rènondéye en fiant l’plin d’vitamines D.
« 9 ! Èt vos, nosse dame, vos z’èstez en manke savoz ! »… disti l’docteûr.
C’èst l’prétimps èt lès mouchons tchantè ! Dji n’va nin cwant min.me mi lèvè asteûre… dji va fè chonance di dwârmu… chuuut ! Il èst brâmint trop timpe, maîs dji mûsenéye dins m’tchèsse li tchanson dès Beatles « Blackbird singing in the dead of night… »[1].
Milliard, ci mauvi-la tchante à câssè vos’orèyes, i faît ostant d’bru qui les « omes dès poubèles ».
Dji n’ dwâme pus qu’ d’ on-ouy, adon dji va m’lèvè, il èst 5h30, dji va fè lès chèles do djoû di d’vant…
À l’fin, c’ è-st-one bèle musike li tchant do mauvi !
Èt do timps qu’dji faîs lès chèles…nos’ prétimps tûse ossi…
« Poqwè c’qui c-t-ivièr-ci li tchè da Josline a crotchî l’pîlau do corti ? I gn’éve qu’onk non di djo ! Quéne afaîre, c’èst télemint bè on pîlau… »
C’èst l’prétimps èt lès djètons dès aubes mostrè li d’bout do nez.
Lès-cis’ dol haye fwârt avant ! Lès Ligustrum vulgare si foutè d’mi avou leûs chichelotadjes èt leûs rizéyes cwand dji r’monte li pazê.
« Ayi m’fèye, nos vikant co… Bin vite, vos aléz sofru cwand vos duvrez nos rabinè su 2 côps 50 mètes di long et 2 mètes di hôt, dins on bokèt d’têre qui distchind à vos fè avère li toûrnis’ èt one chaule qui vos n’arivèz nin à mète d’assène ».
C’èst l’prétimps, li solê cligne dès ouys, lès mouchons zoublotè à deûs èt lès djètons s’dismoussè…
Quéne mérvèye !
- ↑ Li tchanson des Beatles « Blackbird singing in the dead of night » : c’èst st-on neûr mauvi cwachî, qui rprèzinte li lûte des neûrs amerikins po leûs dreûts.