Braibançone walone

Èn årtike di Wikisource.
Ciste ouve ci egzistêye eto divins ds ôtès ortografeyes : Mwaisse sicrijhaedje (1878)Feller.
Braibançone walone
rortografiaedje da Lucyin Mahin
1878 (mwaisse) / 2023 (rortografiaedje)


Braibançone walone

I.

Hay, levans nos, les efants del libe Beldjike;
On grand djoû d' fiesse po tos nozôtes sorvént.
Flaminds, Walons, d' on cour franc, enerdjike
Maxhans nos vuzes po tchanter l' an cwate-vint.
Dispoy l' an trinte, nos vicans bén eshonne
Dizo les lwès del sinte Fråternité.
Dinans nos l' mwin, el minme fiesse nos rashonne
Å bea solo del Liberté.

II.

C' est di letes d' ôr k' on dvreut scrire noste istwere:
Vla céncwante ans k' on n' åye pus etindou
L' canon del guere so nosse bea teritwere
Ki, si sovint, do sonk, a stou tindou.
Bedjes, nos polans esse firs di nosse patreye :
A l' tiesse des ôtes, elle a todi roté.
Ele voet flori les syinces et l' industreye
Å bea solo del Liberté.

III.

Cezår l' a dit : « Les Bedjes sont plins d' coraedje »
I s' fijèt khatchî po ricweri leus droets.
Mins voci l' påye; loukîz les a l' ovraedje !
Les ovrîs bedjes sont co les pus adroets.
A Londe, Paris, Viene et Filadelfeye
Les prumis pris, kî les a repoirté ?
C' est nosse Beldjike ki s' distingue eco ene feye
Å bea solo del Liberté.

IV.

Ki d' edvincions so ces anêyes passêyes
Tot nosse payis est pavé d' bindes d' acî.
Des fis d' årca si tcherdjèt d' nos pinsêyes,
E-n on clegn d' ouy, ele sont pus lon ki l' cir.
Do pôrt d' Anverse, des bateas sins pareys
Evont tchaeke djoû poirter di tocosté
Les draps, les åres les tchîfs-d'ouve ki l' Bedje creye
Å bea solo del Liberté.

V.

Divins les årts, divins l' literateure,
Les Bedjes nén pus ni sont nén les dierins.
Scrijheus, pondeus, årtisses e l' siculteure[1]
Si covrèt d' glwere, insi k' nos muzicyins.
Dvins tchaeke viyaedje, l' instruccion si dispåd,
Nos mwaisses di scole, instrûts et plins d' volté
Semèt-st on grin, l' peupe rascoye ene grosse påte
Å bea solo del Liberté.

VI.

Nos estans libes, nos rotans tiesse levêye,
Gråce a nosse bele, nosse lådje constitucion.
Si kéke vijhén nos lugne d' èn ouy d' eveye
Do monde etir, nos fjhans l' admiråcion.
Tchantans, mes frés, nosse braibançone madjike,
Tot come l' an trinte, l' an cwate-vint voet floter
Les troes coleurs do drapea del Beldjike
Å bea solo del Liberté.

  1. l' uzaedje di « e l' » divant on femin no (sculteure) oblidje a ene ristitcheye voyale (siculteure); did la li rsaetchaedje di « grand po wårder l' pîtaedje »