I.
Haïe, lèvans-nos, èfants dè l'libe Belgique,
On grand joû d'fiesse po tos nos autes survint.
Flaminds, Wallons, d'on cour franc, énergique
Mahans nos voêx po chanter l'an qwatte-vingt.
Duspoïe l'an trinte nos viquans bin essôle
Duzos les löès dè l'sainte Fraternité.
Dunans-nos l'main, lu même fiesse nos rassôle
Au bai solo dè l'Liberté.
II.
C'est en lettes d'or qu'on d'vreut s'crire nosse-t-histoère,
V'là céquante ans qu'on n'auïe pus ètindou
L'canon dè l'guerre so nosse bai territoère
Qui, si sovint, du song à s'tu tédou.
Belges, nos pollans esse firs du nosse patreie :
A l'tiesse des autes il a todi rotté.
Il veut flori les sçiaisses et l'édustreie
Au bai solo dè l'Liberté.
III.
César l'a dit : « Les Belges sont pleins d'corège »
Is s'fet c'hèchi po rucqwèri leus dreuts.
Mais voci l'poïe; louquîs-les à l'ovrège?
Les ovris belges sont co les pus adreuts.
A Londe, Paris, Vienne et Philadelpheie
Les prumis prix qui les a rèppöèrté ?
C'est nosse Belgique qui s'distingue èco n'feie
Au bai solo dè l'Liberté.
IV.
Qu'u d'évintions so ces anneies passeies
Tot nosse pays est pavé d' beines d'ècir.
Des fis d'arka su chergèt d'nos pinseies,
En'on cleigne d'ouïe ils sont pus lon qu'u l' cir.
Dè pôrt d'Anvers, des batais sins parêie
Èvont chaque joû pöèrter du tot costé
Les dreps, les armes, les chîfs-d'oûve qu'u l'Belge crèie
Au bai solo dè l'Liberté.
V.
Duvins les arts, duvins l'littérature
Les Belges nin pus ni sont nin les dièrins.
S'crieux, pondeux, grands artisses en sculpture
Su covret d'glöère, ainsi qu'nos musiciens.
D'vins chaque viège, l'éstruction su dusponte,
Nos maisses du scale éstruits et pleins d'volté
Sèmet on grain, l' peupe rascoïe onne grosse ponte
Au bai solo dè l'Liberté.
VI.
Nos estans libes, nos rottans tiesse lèvèie,
Grâce à nosse belle, nosse lonche constitution.
Su quéque wèzin nos lûgne d'on ouïe d'èvèie
Dè monde èttir nos fans l'admiration.
Chantans, mes frés, nosse brabançonne magique,
To comme l'an trinte, l'an qwatte-vingt veut flotter
Les treus coleurs dè drapeau dè l'Belgique
Au bai solo dè l'Liberté.
Brabançonne wallonne
Brabançonne wallonne
Brabançonne wallonne