On s' duspièrtot a catre eûres å matin pasku les vatches bizint dul djoûrnêye. On les modot, pu les mète ås tchamps. Adon, on-z alot rcoûtchî juska 7 eûres, pu on djunot.
Çu côp la, a 8 eûres, on-z alot vèy s' ile nu bizint nin et s' ile bizint, on les rintrot ou ståle. Gn avot des gros tayans, du ç' tins la ! Cand il alint ås tchvås, falot vèy les tchvås, coume i mouchiyint [chasser les mouches avec la queue].
On n' les rintrot nin si matin s' i pluvot. Pu, on fjot dîj eûres avu la fricassêye.
A midi, on rmarèdot avu doul ratatouye fwête avu des pwès, des rcines et des ougnons, sins rovyî les grands curtons d' mêgue lård. On n' mougnot doul tchår ku les dimatches et on n' achtot co k' dul lêde mèyeû martchî (du bouli et des bas bokèts dou dvant). In rosti par an, al dicåce !
On rtrèyot a midi, cand ille avint vêlé, don. Cand ille alint aler sètch, on n' les trèyot nin cate côps, douwê.
Cand i fjot tchôd ou fnå, on-z alot rcoûtchî ène eûre a midi, pou fé sa prandjîre [sieste].
Pu, a catre eûres, on buvot l' cafè, pu on-z alot rmode li trwâjime côp a cink eûres. Pu, on-z alot al lêtriye avu l' deujime et l' trwâjime modadje. On-z î avot ddja sté å matin avu l' trèyadje du dîj eûres al nute et l' cé d' l' åmatin. Pask' on-z avot co sté rtrêre les vatches après la chîje, la. On-z avot rbancté û rciné (prinde ène chîjime eûrêye après la chîje).
Pu, on-z alot rbancter les vatches avu, les rafôrer, cwè ! Lèzî rinde ène pougnêye du fûr. Et on les rmodot in catrime côp, dabôr. C' astot ène viye du sclâve, hin.
Tins dul guêre, on n' alot al lêtriye k' in côp, pask' on batot l' bûre pou l' ruvinde bêzè tchîr.
raconté pa Aline Brolet, rapexhî li 30 d' awousse 2001.