Avatår

Èn årtike di Wikisource.
Avatår
Li Rantoele,  97,

Li Walonreye n’ est pus l’ botroûle del Daegne po les bindes d’ imådjes (bindes ås desséns) come do tins da Morris, Hergé, Peyo, Lambil, et hay vos nd åroz. Asteure, c’ est les Aziyatikes k’ ont l’ martchî.


Dj’ a-st aprins a dessiner so m’ tåvlete éndjolike. Mins po les vizaedjes, dj’ a bea fé, dji rtome todi so l’ caire des persounaedjes des dessineus chinwès u djaponès, come dins les fimes d’ imådjes ki dji louke tos les djoûs so m’ sûtifone.

Gn a onk k’ on trouve e fouyton, ki dji n’ a nén co tot rwaitî, c’ est « Avatår ». Dji m’ vos l’ va prezinter.

Cwate peupes

C’ est l’ istwere di cwate peupes, li ci d’ l’ Aiwe, li ci d’ l’ Air, li ci del Tere et li ci do Feu.

On prezinte li cwacwa al prumire secwince : les cwate peupes viként e påye. Mins a on metou moumint, li peupe do Feu a yeu l’ idêye di fé l’ guere ås ôtes. Gn aveut k’ ene djin capåbe di mete ahote a ces margougnaedjes la. C’ esteut Avatår (on l’ voet ki håsplêye tot ådzeu d’ on hôt tiene dins l’ epizôde d’ adrovaedje). Mins nerén, tot d’ on côp, il a disparexhou.

Li rîlêye [série] del prumire såjhon kimince cint-z ans après cisse guere la. Les cis do peupe do Feu sont todi ossu waeraxhes [agressifs] ; c’ est zels les metchants. I hinèt do feu so totes les djins k’ i volnut distrure.

Dins l’ peupe di l’ Aiwe, on fwait cnoxhance avou Kitara et s’ fré. Leu mame a stî touwêye al guere. Mins l’ glawene a-st erité do don di cmander a l’ aiwe. Metans : fé monter des boles d’ aiwe dins l’ air (avou on pexhon dvins). Si pout ele fé del glaece cwand ele vout. Tén, la rén ! N’ årént i nén hapé l’ idêye del royinne del nivaye, li fime d’ imådjes Disnè ?

Li peupe di l’ Air a stî pår dizindjné [décimé] dins les macsådreyes des cis do Feu. I n’ dimeure pus k’ ene mierdjin [individu] po l’ riprezinter, c’ est djustumint nost « Avatår ». C’ esteut co èn efant d’ 10 ans, adon, et il a stî schapé pask’ i s’ a rtrové edjalé dins èn isbiè [iceberg]. Cwand il a rligné, i n’ aveut todi k’ 10 ans. Mins, di sogne ki les cis do Feu nel volénxhe apicî, i s’ fwait lomer Ink. Lacobén ! Il aveut stî scolé tot djonne pa on grand mwaisse di s’ peupe, et aprinde tos les toûs po mwaistri l’ air, li shofler pouxhanmint, et s’ enûler avou.

So on prezintaedje e walon pa Souzane Mahin,
rimetou e muzike cial li 19 di fevrî 2021.