Gn a 101 ans k’ i vna-st å monde a Biarin…
Il a stî fé ses umanités a Dinant, divant d’ aler a Lidje po-z î divni medcén. Des clapants studiaedjes a l’ ospitå d’ Bavire.
Si clapants, ses studiaedjes, k’ on lyi dmanda do divni professeur a l’ univiersité. Mins, ci n’ esteut nén po ça k’ i s’ aveut fwait docteur. C’ esteut po s’ mete å siervice di ses djins et soladjî leus mizeres. Adon, i rfuza les oneurs et rintra-st å payis, e l’ Fåmene.
C’ esteut on deur mestî ki l’ mestî d’ medcén di ç’ tins la. On mestî ki l’ emoennéve bén lon, afeye minme disk’ ås Vås d’ Simwès. Ses råles moumints da lu, c’ esteut, aprume, po s’ famile : il aveut traze efants ! Mins c’ esteut avou po l’ literateure. Il ataca a scrire, e francès po cmincî, des fåves come les cenes da La Fontinne. Mins ç’ n’ esteut nén teribe.
Si vraiye voye, i l’ trova avou les scrijhaedjes e walon. La, i divna onk des meyeus di s’ tins. Portant, a ç’ moumint la, li literateure walone, c’ esteut c’ esteut wai d’ tchoi.
Mins, e l’ an 1956, li « Société Liégeoise de Littérature Wallonne » (divnowe asteure li boune viye S.L.L.W.) aveut veyou l’ djoû. Magré k’ i n’ esteut nén d’ Lidje, Vermer î aveut wårdé bråmint des cnoxhances. Adon, i ndè fourit onk des prumîs mimbes corespondants. Å resse, li sôce publeyrè sacwantes di ses ouves.
Vermer a bén fwait do scrire e walon, li lingaedje ki plakéve a ses djins. Nol ôte lingaedje n’ åreut mî polou dire come lu çou k’ i pinsît, çou k’ i tuzît, çou k’ il estît. S’ i djåze si bén d’ ces ptitès djins la, c’ est k’ i les cnoxhe, k’ i les comprind, et k’ i les inme. Minme si, sovint, il est ene miete mocåd.
Mocåd, ciete, mins l’ mocreye est tote tene et sins calinreye [méchanceté]. I reye di leus couyonådes et d’ leu bounasté, mins i n’ fåt nén greter lon dzo les mots po trover l’ umanisse.
Houte di çoula, ses scrijhaedjes, contes, fåves, tchansons, sont-st on vicant temoennaedje so çou k’ esteut l’ vicåreye e l’ Fåmene å mitan do dijh-nouvinme sieke. Prindans po egzimpe « li comunisse » et nos sårans çou les djins del campagne pinsît des novelès idêyes.
Dins ç’ tecse la, Vermer djowe avou deus persounaedjes : li pere, on payizan oniesse et sincieus, ki n’ rinoye nén l’ lingaedje di ses tåyes et dmeure bén avou ses deus pîs so l’ tere, et l’ fi, on sot k’ a stî a Paris, wice k’ on lyi a tourné l’ tiesse. Ki rvént å payis, grandiveus, petant l’ francès et prindant ses djins po des rescoulés.
Ene di ses tchansons les pus cnoxhowes, c’ est « Les mizeres do medcén » wice k’ i s’ plait a raconter les astrapådes del vicåreye d’ on medcén d’ campagne.
On n’ si rind pus conte po l’ djoû d’ ouy, çou k’ c’ esteut l’ vicåreye d’ on docteur a l’ campagne asteure k’ on-z a des bounès voyes, asfaltêyes et loumêyes. Et des bounès vweteures tchåfêyes et rapides. Rén d’ tot ça d’ avance.
Mi-minme, dj’ ouri onk di mes ratayons, li docteur Henri Joseph Henroz (1781-1864) k’ esteut docteur a Harsin. Dji m’ rapinse k’ on ndè djåzéve co cwand c’ est k’ dj’ esteu efant. On riyeut tot racontant k’ del nute, c’ esteut si tchvå k’ el ramoennéve e s’ måjhone, la k’ i doirméve e vweteure.
Dji comprin mî asteure. Cwand c’ est k’ on l’ vineut houkî, del serêye nute e l’ ivier, po-z aler disk’ a ene cinse, e fén fond des bwès, acoûtchî ene feme ki ça n’ aléve nén. Dizo l’ beulêye [bourrasque], e l’ sipexheur, pa des voyes ki nd estént nén. Dj’ el voe rivni, nåjhi, nanti, rindou, après aveur lofté deus grandès gotes, leyî les rinnes a si tchvå et s’ essocter, ewalpé e s’ covtoe.
L’ otomobile candjrè bråmint des afwaires, awè ki…
Dj’ a rescontré l’ an passé e viyaedje ki m’ grand-pere et m’ mononke î avént stî medcéns, ene foirt avnante viye djin ki m’ raconta k’ i n a swessante ans passés, la k’ elle esteut djonne feye, mi mononke l’ aveut dvou operer d’ ene peritonite, so l’ grande tåve del coujhene, e l’ cinse di ses parints.