1. Après avë causé insë, Jésus à lèvé sès-ouys dins lë stwèlî, èt dîre « Père, c’èst l’eûre ! Rindoz bon d’vwêr à vosse Fë, po qu’ vosse fë vos rinde bon d’vwêr.
2. Vos lî avoz d’né l’ pouvwêr dëssë tot ç’ quë vëke, po qu’ë pouye leûzi d’né à zèls, lë vëkaîrîye quë vos l’zi avoz d’né.
3. D’abôrd, ë crwèyenèt à l’ vîye quë n’ fënë jamaîs, c’èst don quë vos conèchenèt, vos, lë seûl Bon Dië èt më qu’ vos l’zi avoz avôyî, Jésus-Christ.
4. Djë v’s-a rindë bon d’vwêr dëssë l’ têre, lë bèsogne quë vos m’avoz d’né à fé è-st-achèvéye.
5. Asteûre Nosse Pa rindoz m’ bon d’vwêr, come djë l’avo d’djà dè timps qu’ë n’avot co rén, dë ç’ quë v’s-avoz faît.
6. Dj’a faît conèche vosse nom à tos lès-omes quë v’ m’avoz d’né. Ël èstîn’ da vos. Vos m’ lès-avoz d’né. Ë conèchenèt ç’ quë v’s-avîz à leû dîre.
7. Asteûre, ë r’conèchenèt qu’ tot ç’ quë v’ m’avoz d’né, c’èst vos quë m’ l’a d’né.
8. Pace quë djë l’zi à d’né lès mots quë v’ m’avoz d’né, ë lès-ont dins leû keûr. Ë r’conëchenèt quë vos-èstoz m’ Pa èt qu’ c’èst bén vos quë m’a-st-avôyî ad’lé zèls.
9. C’èst por zèls quë dj’ dë dès pâtêrs, Djë n’ prîye ni po tot l’ monde, mins bén po lès cës quë v’ m’avoz d’né, po quë fëchenèche come nos !
10. Tot ç’ qu’èst da më, c’èst da vos, èt tot ç’ qu’èst da vos èst da më èt ë nos rindenèt bon d’vwêr.
11. Djë n’ so pës dins l’ monde. Zèls î sont èt djë r’monte ad’lé vos. Binamé Bon Dië, më pa, aurdoz ad’lé vos lès cës quë v’ m’avoz d’né, po qu’ë seûyenèche come nos deûs.
12. Quand j’èsto au mëtan d’ zèls dëssë l’ têre, djë lès-âurdéve come vos l’arîz faît. Dj’a aurdé lès cës quë v’ m’avoz d’né, èt dj’ènn’a pont pièrdë à paur lë cë quë m’ va vinde, come ça a stî anoncî par nos tayons.
13. Mins asteûre, c’è-st-à vos quë dj’ cause come dj’a causer po tortos, po que l’apëd’nèche lès djôyes quë v’ m’avoz d’né.
14. Djë leüzi à d’ né vosse parole, èt ë n’ont ni comprë, pace qu’ë n’ sont ni come zèls, come më djë nè l’ so ni non pës.
15. Djë n’ vouroz ni qu’ vos lès rovïyeriz, èt djë v’ prïye po qu’ vos lès-aurdiz foû dès pates dè l’ diâle.
16. Ë n’ sont ni dë ç’ monde là, come më djë nè l’ so ni non pës.
17. Rindoz lès come vos vourîz qui fuchenèche, c’èst vos qu’èst dins l’ bon.
18. Èstant d’né qu’ë sont vélà èt vos m’î avoz avôyî èto,
19. Djë sacrifîye por zèls po qu’ ë fuchenèche dins vosse vèrëté.
20. Djë n’a ni prétchî rén qu’ por zèls, mins èto po tos lès cës quë front come vos m’ l’avoz d’ mandé dè fé, èt quë m’ crwèront
21. po qu’ë n’ faîynëche qu’onk, come nos l’èstant vos èt më. Quë zèls èto, në faîyenëche qu’onk avou nos, èt m’ crwèy’nèche.
22. Djë l’zi a d’né vosse glwêre, po qu’ë n’ faîyenëche qu’onk come nos.
23. Më dins zèls, èt më dins vos, po quë fuchenèche lë mèyeû dès ègzimpes èt quë l’ monde rëconèche bén qu’ c’èst vos quë m’a èvôyî ad’lé zèls, quë v’ lès vèyoz voltî come vos m’ vèyoz voltî.
24. Nosse Pa, vos m’ lès-avoz d’né et djë vou qu’ë fuchenèche avou më là èwou quë dj’ sèrè, po qu’ë vèyenèche l’oneûr quë v’ m’avoz d’dja d’né dëvant d’avë faît l’ monde.
25. Nosse Pa, qu’èst jësse èt bon, cès djins là n’ vos-ont ni conë, mins më dj’ vos conè, èt zèls ë pol’nèt acèrtëner qu’ c’èst bén vos quë m’a avôyî ad’lé zèls.
26. Djë l’zi frè conèche vosse nom èt l’eûzi fé comprinde quë tot l’amour quë v’ m’avoz d’né, djë l’a paurtadji avou zèls.