1. Djë vos l’a dët po vos spaurgnî d’avë faît ça.
2. On vos mètrè à l’ëch dès-èglîjes. Èt co bén d’ pës, lë cë qu’ vos touwerè, pinserè quë faît l’ovradje dè l’ Bon Dië.
3. Èt ça, ë l’ f’ront pace qu’ë n’ont ni volë nos r’conèche, më Père èt më.
4. Mins djë vos l’ dë, po qu’ à l’eûre èwou qu’ ça tchaîrè, vos v’ rap’loche quë dj’ vos l’a dë. Djë n’ vos l’a ni dë à l’èdaume, pace quë dj’èsteû avou vos-ôtes.
5. Mins asteûre, quë dj’ m’èrva ad’dé l’ cë quë m’a èvoyî, ë n’a ni onk dë d’ vos-ôtes quë m’ demande « èwou aloz ? »
6. Èt pace quë djë v’s-a dët tot ça, vosse keûr est plin d’ dîloujances.
7. Djë v’ dë l’ vèrëté. C’èst mia insë por vos, pace quë së djë n’ m’èva ni, lë cë quë vos pouroz rapaujë në vaîrè ni, èt cë dj’ m’ènn’èva, djë vos l’èvôyerè.
8. Èt quand ë sèrè la, ë fré rinde raison à tortos po ç’ qu’ènnè dè l’ pètchî, dè l’ jëstëce èt dè l’ jëjemint.
9. Po ç’ qu’ènnè dè l’ pètchî, pace qu’ë n’ m’ont ni crwèyë.
10. Lë jëstëce : pace quë djë m’èrva ad’lé m’ Pa, èt qu’ vos n’ më vwèroz pës.
11. Lë jujemint : pace quë më lë prénce dë ç’ monde cë èst d’da jëjé.
12. Dj’a co branmint à vos dîre, mins vos n’ sâriz lès sopwârter po l’ momint.
13. Quand l’ cë quë pouroz vos rapaujë sèrè là, lë, l’èsprët dè l’ vèrêté, ë vos min.nerè dins l’ vèrëté, ë n’ vos causerè ni dë d’ lë minme, mins ë v’causerè dë c’ qu’ël a ètindë, èt ë vos mostër’rè vosse planète.
14. Ë vos donerè oneûr, pace qu’ë pèseré cë qu’èst da më, quë dj’ vos-a anoncï èt ë vos l’ dirè.
15. Tot ç’ quë m’ Père a, c’èst da më, c’èst po ça qu’ dj’a dë qu’ë pëdrè tot ç’ qu’èst da më èt qu’ë vos l’ dirè.
16. Cor one miète dë timps, èt vos n’ më vwêroz pës, èt après cor one miète dë timps, èt vos m’ vwêroz pace quë djë sèrè là avou lë.
17. Là d’ssë, sès soçons ont forbatë yinte zèls : Qwè !’ quë ça vous dîre cë qu’ë nos a dët là ; cor one miète dë timps èt vos në vwèroz pës, èt parès : cor one miète dë timps èt vos vwèroz, èt djë m’èrva d’lé m’ Père ?
18. Ë d’djîn’: Qwè yèsse quë ça vous dîre, cor one miète dë timps ? Nos compërdans ni ç’ qu’ë vous dîre !
19. Jésus a aprins qu’ë v’lîne soyë qwè èt leûzi dîre. Vos vos forbatoz non-l’ôtes së ç’ quë dj’a dët: cor one miète dë timps èt vos n’ më vwèroz pës, èt après cor one miète dë timps èst vos m’ vwèroz !
20. À l’ vèrëtë, à l’ vèrëté, djë vos l’ dë, vos tchuleroz èt vos plinde, èt tot l’ monde ènn’è sèrè bënauje, vos vëkeroz dins l’ diloujance, mins vosse diloujance toûnerè à fièsse.
21. One feume quand èle va mète on-èfant au monde, èlle a dè l’ diloujance, pace quë c’èst l’eûre dè l’ dèlivrance. Mins quand l’èfant èst là, èlle a rovî totes sès sofrances, pace qu’èlle èst bënauje d’avë d’ner on-ome së l’ têre.
22. Vos-otes èto vos-èstoz dins l’ diloujance po l’ momint, mins djë vos r’vwèrè, èt vosse keûr sèrè fén plin d’ bënaujeté èt pës pèrson.ne në vos l’ rëprinde.
23. Èt djoû là, vos n’aroz pës rén à më d’mander. C’èst l’ vèrëté, c’èst l’ vèrëté, èt tot ç’ quë vos d’mand’roz à m’ Père, c’èst par më qu’ë vos l’ donerè.
24. Tot ’squ’asteûre vos n’ lî avoz rén d’ mandé dë m’ paurt. D’mandoz, èt vos r’çûroz, vosse djôye sèrè au d’là dë ç’ quë v’ p’loz sondjî.
25. Djë v’ dë tot ça come cë s’ sèroz one fauve. Quand l’eure sèrè là, djë n’ vos causerè pës insë, mins djë causerè, tot laudje, dë m’ Père.
26. Cë djoû là, vos lî d’manderoz dë m’ paurt, èt djë n’arè ni à l’ priyî por vos.
27. Pace quë l’ Père, lë èto ë vos vwèt voltî, pace quë vos m’avoz vèyë voltî èt qu’ vos crwèyoz à bon quë dj’ so l’ èfant do Bon Dië.
28. C’èst lë quë m’a faît vëker, asteûre djë quëte lë têre èt djë rabroke ad’lé lë.
29. Sès soçons lî dëjenèt: volà qu’asteûre vos n’ causoz pës come dins one fauve.
30. Asteûre, nos avans comprins quë vos èstoz l’ maîsse dë tot èt qu’ë n’a ni dindjî d’vos d’mander. Nos crwèans, nos-èstans seûrs quë v’sèstoz l’ fë dè l’ Bon Dië.
31. Jésus leûzi à rèspondë: asteûre vos crwèyoz.
32. Volà, c’èst l’eûre, èlle èst d’dja èdauméye, vos v’s-aloz dispaurpî chaque dë s’ costé, vos m’ lairoz tot seû, mins djë n’ so ni tot seû, më Pa è-st-avou më.
33. Djë vos-a dët tot ça po qu’ vos-auyoche tote vosse fiyâte è sondjant à më. Vos-aroz dès toûrmints pa t’t-avau d’ssë l’ têre, Mins fëchiz coradjeû, djë sèrè pës fwârt quë l’ monde.