1. Jëstëmint, i-n-aveût dins lès farëzyins on'ome loumé Nëcodéme, on gros dins lès gros dès Jwifs.
2. Il a v'në l' trover dè l' nêt èt i li dët: "Rabbi (Maîsse), nos savons qu' c'èst dèl' paurt dè Bon Dië quë t'ès v'në come savant; paç'quë nëk' në pout fé cès mëraukes-là quë t' fais, së l' Bon Dië n'èst ni avou lë".
3. Jésus li responda: "Vraiy' dë vraiy', djë tè l' dët, nëk, së n' sëkèpîye ni d'È-waut, në pout veûye lë rwèyaume dè Bon Diè."
4. Nëcodéme li dët: "Comint ç' qu'on ome dèdjà vî poût-ë v'në au monde? Pout-ë rintrer on deûzième côp dins l' vinte dë s' mame èt v'në au monde?"
5. Jésus rèsponda: "Vraiy' dë vraiy', djë tè l' dët, nëk', së n' vént ni au monde fou d' l'êwe èt d' l'Esprët, në pout veûy' lë rwèyaume dès ciéls.
6. Cë qu’a skèpiyi dê l’ tchau èst tchau. Çë qu'a skèpiyi dë l'Esprët èst èsprët.
7. Në t 'saisëche ni së dj' t'a dët: "ël faut quë vos v'noche au monde d'È-waut.
8. Lë vint sofèle d'où ç' qu'i voût, èt t' l'intinds, mins të n' sés nè d'où qu'ë vént, nè w'où ç' qu'ë va. Insë, c'èst l' min.me po n'émpôrte qui qu'èst v'në au monde dë l'Esprët.
9. "Nëcodéme li dëja :"Comint ç' quë ça s' pout fé?"
10. Jésus li rèsponda: "T'ès l' savant d'Israyèl' èt të n' sés ni ça?
11. Vraiy' dë vraiy', djë tè l' dët: nos causons dë ç'quë n' savons èt nos acèrtënons cë quë nos avons vèyë, mins vos n' rëçûvoz ni nosse tèmwègnadje.
12. Së vos n'avoz ni crwèyë quand dj' vos a causé dès afères dèl' tère, comint crwèrîz së dj' vos cause dès afères dè ciél?
13. Et pèrson.ne n'èst monté au ciél, èkcèpté l' cë qu'èst dëskindë dè ciél', lë Fë d' l'ome.
14. Et come Moyësse a st-aclèvé l' sèrpent dins l' désèrt, c'è-st-insë qu'ë faut qu' l'ome seûy' aclèvé,
15. po qu' n'émpôrte qui quë crwèt, auy' dins lë, l' vîye ètèrnèle."
16. Paç'qui l' Bon Dië a tant in.mé l' monde qu'il a d'né s' Fë-tot-seû, po quë tortos lès cës quë crwèynèt è lë, në mournèche ni, mins qu'is auynèche lë vîye ètèrnèle.
17. D'èfèt, lë Bon Dië n'a ni avôyi s' Fë dins l' monde po jëjér l' monde, mins po quë l' monde seûy chapé par lë.
18. Lë cë qui crwèt è lë, n'èst ni jëjé. Lë cë qui n' crwèt ni èst dèdjà jëjé paç'qu'i n'a ni crwèyë au nom dè Fë-tot-seû dè Bon Diè.
19. Vocë d'abôrd lë jëjmint: lë Lëmîre èst v'nouwe dins l' monde, èt lès omes ont in.mé mia lès nwèreûrs quë l' Lëmîre, paç'quë leûs travaus èstîne mauvais.
20. Paç'quë l'cë qui fait l' mau, veût mau èvë l' Lëmîre, èt n' vént ni à l' Lëmîre dë peû qu' sès travaus në s' mostërnèche po ç' qu'ës sont.
21 Mins l' cë quë fait l' vèrëté vént à l' Lëmîre, po qu'on veûy quë sès travaux sont faits dins l' Bon Dië.
22. Après ça, Jésus èn'ala avou sès scolîs au payis d' Judèye, èt il i d'mëreûve avou zèls èt i bâtëjeûve.
23. D'èfèt, Djan bâtëjeûve ossë à Aénon, à stoc' dë Salim, paç'quë là i-n-aveût branmint d'êwe èt lès djins v'nîne së fé bâtëjî.
24. Paç'quë Djan n'aveût ni co stî foutë è l' prîjon.
25. Adon one dëspëte arëva inte saquants dès scolis da Djan èt on Jwif à propôs dè l' përëfëcacion.
26. Et is 'n-alîre addé Djan èt li dirîne: "Rabbi, lë cë qu'èsteût avou twè, d' l'aute costé dè Jourdain èt à qui t'as rindë tèmwègnadje, lë volà qu'i bâtîje èt tot l' monde vént 'dé lë.
27. Djan rèsponda: "Pêrson.ne në pout prinde cë quë n' li a ni stî doné pa l' Ciél.
28. Vos autes-min.mes èstoz mès tèmwins qu' dj'a dët: "Më, djë n' sos ni l' Christ, mins dj'a stî avoyî d'vant lë.
29. Lë cë qu'a l' fème, èst l'ome; mins l' camarade dë l'ome, que s' tént addé lë èt qui l' choute, èst rimplë dë djôye quand il intind l'ome. Cë djôye-là, c'èst l' mëne, èt èle èst' au d'zeû d' tot.
30. I faut qu'i crèche èt quë dj' dëmënouwe.
31. Lë cë quë vént d'È-waut èst'au d'zeû d' tortos. Lë cë qu'èst dèl' tère èst' amateûr dèl' tère èt cause dèl' tère. Lë cë quë vént dè ciél' èst' au d'zeû d' tortos;
32. il acèrtëne cë qu'il a vèyë èt intindë, èt pèrson.ne n'accèptèye së tèmwègnadje.
33. Lë cë quë r'çût s' tèmwègnadje a sëgné èt mètë s' cachèt quë l' Bon Dië èst vraiy'.
34. Pace que l' cë quë l' Bon Dië a st'avoyi pornonce lès paroles dè Bon Diè, pacequë l' Bon Dië n' li done ni l'Esprët avou mèsère.
35. Lë Père in.me lë Fë èt il a tot r'mètë è s'mwin.
36. Lë cë quë crwèt au Fë a l' vîye ètèrnèle; lë cë quë rèfëse dë crwère au Fë, në vièrè ni l' Vîye, mins l' colère dè Bon Dië d'meûre dëssër' lë.