1. Adon, quand l' Sègneûr a soyë quë lès farëzyins avîne ètindë dîre quë Jésus fëjeûve èt batëjeûve dë pës dë scolîs quë Djan,
2. - portant Jésus n' batëjeûve ni lë min.me, (mins c'èsteût sès scolîs qui batëjîne) -
3. i lèya là l' Judéye èt i rala co èl' Galiléye.
4. Mins i d'veûve trëvièssér l' Samarîye.
5. Il arëva dins one vële dë Samarîye louméye Sychar addé l' tère quë Jacob aveût d'né à s' fë Djôsèf.
6. Là, i s' troveûve lë pës' dë Jacob. Jésus, naujë d'oyë fé l' voyadje, èsteût sémplëmint achide à stoc' dè pës'. Il èsteût aviè chîj' eûres. (doze eûres po nos-autes, asteûre).
7. One fème dè l' Samarîye arëva po poujî d' l'êwe. Jésus li dët: "Done më à bwère".
8. Paç'quë sès scolîs èstîne èvôye à l' vële po-z-achèter d' l'amougnî.
9. Lë Samarëtène li dët: "Comint èst'ë possëbe quë twè, qu'èst'on Jwif, më d'mande-t-ë à bwère à më, quë dj' sos st'one Samarëtène?" Paç'quë lès Jwifs në caus'nèt ni avou lès Samarëtins (is n' lès polnèt sinte nè oudér).
10. Jésus li rèsponda: "Së të conëchreûs l' donacion dè Bon Dië èt qui èst-ce lë Cë qui t'dët: Done-më à bwère, c'èst twè qui Li areût d'mandé, èt I t'areût doné dèl' vëkante êwe."
11. Ele li dëja: "Sègneûr, të n'as rén po poujî èt l' pës' èst parfond. Comint areûs' fait adon po-z-oyë cë vëkante êwe-là?
12. Ès' pës grand qu' nosse père Jacob quë nos a d'né cë pës' cë, èt i 'nn' a bèvë èt sès fës èt sès troupias ossë?
13. Jésus li responda: "N'émpôrte lë quénque qui bwèt dë ç'êwe-cë, arè co swè;
14. à l' place, lë cë qui bwèrè dë d' l'êwe quë dj' li dôrè, n'arè jamais pës swè, mins l'êwe quë djë li dôrè d'vêrè, è s' cwarps, one soûce d'êwe sourdant po l' vîye ètèrnèle."
15. Lë fème li dët: "Sègneûr, done më ç' t'êwe-là, po quë dj' n'ôye pës swè èt quë djë n' vègne pës vêcë po poujî."
16. I li dët: "Vas-è qwère të y-ome èt rëvéns vêcë."
17. Lë fème li rèsponda: " Djë n'a pont d'ome". Jésus li dët: "T'as bén dët: Djë n'a pont d'ome,
18. paçe quë t'as stî mariyée cénq' côps, èt l'ome quë t'as àsteûre n'èst ni t'y-ome; po ça t'as dët l' vraiy'.
19. Lë fème li dët: "Sègneûr, djë veûs qu' t'ès st-on proféte.
20. Nos péres ont adoré sës' ç' montagne-cë; èt vos d'joz qu' c'èst Jérusalèm lë place èwoû ç' qu'ë faut adorér."
21. Jésus li dët: "Crwès dins më, fème, l'eûre vént quë cë n' sèrè pës nè s'sës ç' montagne-cë nè à Jérusalèm quë vos adorroz l' Père.
22. Vos adoréz, vos-autes, cë qu' vos n' conëchoz ni; nos adorons, nos-autes, cë qu' nos conëchons, paç' qu'on z-èst chapé pa lès Jwifs.
23. Mins l'eûre arëve où ç' quë lès vrais adorateûrs adorront l' Père dins l'Esprit èt l' vèrëté; paç'quë c'èst dès adorateûrs insë quë l' Père voût.
24. Lë Bon Dië èst' Esprët èt lès cës quë L'adôrnèt dëv'nèt adorér dins l'Esprët èt l'vèrëté."
25. Lë fème li dët: "Djë sés quë l' Mèssîye -ça voût dire lë Christ - deût v'në, i nos apëdrèt tot."
26. Jésus li dët: "Djë l' sos, më quë t' cause!"
27. Là d'sër, volà sès scolis qu'arëvnèt èt is èstîne saisës qu'i causeûve avou one fème. Nëk' portant n' dët: "Quë vous'?" ou bén: "Poqwè causes-të avou lèye?"
28. Et l' fème lèya là s' sèya èt 'n-ala à l' vële èt dët st-aus djins:
29. "Vënoz veûy' on' ome quë m'a dët tot ç' quë dj'aveûs fait. N'èst'-ë ni l' Mèssiye?"
30. Is vénre fou dè l' vële èt 'n-alîre po 'nalé 'dé lë.
31. Dë ç' trèvint-là, lès scolîs lë priyîne: "Rabbi, mougne."
32. I l'zis dët: "Dj'a on' àmougnî qu' vos n' conëchoz ni."
33. Lès scolîs së d'jîne adon l'onk' à l'aute: "Est' ç' qu'one saquë lî areût st-apwarté à mougnî?"
34. Jésus l' zis dët: "M'y-àmougnî c'èst d' fé l' volonté da l' Cë quë m'a st-avôyi èt d'achèver s't-ovradje.
35. Në d'joz ni: Eco quate mwès èt ç' sèrè l'aoûsse? Et bén, djë v'dës: Elèvéz vos-ouy' èt vèyoz come lès campagnes sont djà djènes po l'aoûsse.
36. Dèdjà l' soyeû r'çût s' payemint èt rascoûd l'aoûsse po l' vîye ètèrnèle, èt dë ç' maniére-là, l' cë quë sème së rafîye è min.me timps quë l' cë quë rècoltéye.
37. Paçquë vaicë lë spot dët l' vraiy': c'èst' on' aute quë sème quë l' cë quë rècoltèye.
38. Djë v's a èvoyi rècoltér cë quë n' vos a costé nëne pwène; dès autes ont travayî èt c'èst dins leû travay' quë v's-èstoz st'intrés."
39. Branmint dès Samarëtins dë ç' vële-là ont crwèyë dins lë, sûvant ç' quë l' fème aveut dët:" i m'a dët tot ç' quë dj'a fait."
40. Insë don, quand lès Samarëtins ont v'në dé lë, ils l'ont priyî dë d'mèrer avou zèls. Et i d'mëra deûs djous.
41. Et i 'n-a co d'pës qu'ont crwèyë dins lë, tél'mint qu'i causeûve bén;
42. èt is d'jîne à l' fème: "Cë n'èst pës tès contes quë nos crwèyons, paçquë nos l'avons intindë nos-autes min.mes, èt nos-èstons sûrs èt cèrtins qu'il èst vraiymint l' Sauveûr dè Monde".
43. Après cès deûs djoûs-là, il 'èn'ala po l' Galilèye.
44 Jëstëmint, Jésus lë min.me a dèclaré qu' në proféte n'èsteût admëré dins s' prôpe payës.
45. Insë don, quand il arëva èl' Galilèye, lès Galëlèyins l'ont r'çû paçqu'is avîne vèyë tot ç' qu'il aveût fait à Jérusalèm dè timps dèl' fièsse; paçquë zèls ossë avîne sitî à l' fièsse.
46. Il' a ralé à Cana dë Galëlèye don, èwou ç' qu'il aveût changé l'êwe è vén. Et jëstëmint i-aveût on èplwèyé dè rwè quë s' fë èsteût malade à Capharnayom.
47. Come il aveût intindë dire quë Jésus èsteût rëv'në d' Judéye è Galiléye, cët' ome-là a v'në dé lë èt i li d'manda d' dëskinde po r'fé s' fë, paçqu'i moreûve.
48. Adon Jésus li a dët: "Së vos n' vèyoz ni dès mëraukes èt dès djèsses, në crwèyoz vraiymint ni?"
49. L'èplwèyé dè rwè li dët: "Sègneûr, dëskind abîye dëvant quë m'y-èfant n' moure!"
50. Jésus li dët: "Vas, të fë vëque." L'ome a crwèyë à l' parole quë Jésus li aveût dët èt il' èn'ala.
51. Il èsteût d'jà en route quand sès sèrvëteûrs ont v'në po l' rèscontrér èt li dire quë s-t-èfant èsteût bén vëkant.
52. I l' zis d'manda à quëne eûre qu'i s'aveût trové mia. Is li ont dët: "A sèpt eûres, c'èst' ayir qu'il a sti quëte dèl' fîve."
53. Lë père a r'conë insë quë c'èsteût à ç't'eûre-là quë Jésus li aveût dët: "Të fë vëque". Et il a crwèyë, lë èt tote së maujone.
54. Ça a sti l' deûzième mërauke quë Jésus a fait après' oyë sti d' Judéye è Galiléye.