- Û ç' qu' il astint cès prés-là qu' on rêwot ?
- Su tout ç' qu'on loume la Praîrîye: ç' astot ène coûtère du prés qu' alot quausu du Bèstin jusqu'à l'êwe du Lèsse. Ènut′, çu n'èst pus qu' dès sapins tout l' long. C'èst vraî qu' ç'astot ène kèrwêye du fèner cès tiênes-là. Pourtant, lès djins n'aurint nin co vindu leûs bokèts du 1' Praîtîye pou ène gade d'ôr, maugré qu'is ni ramassint souvint qu' du sâké fûr. Is d'jint quu l' fûr du pré ruf'jot du nû sang aus vatches. C'èst vrai quu 1' fûr du pré, ç'astot toutes plantes naturèles, qu' on n' trovot nin dins lès pachis èt dins lès patures. On f'jot lu f'nau dès prés après l' cé dès-ôtes bokèts. Ç'astot ène cale, sés', d'aler fautcher su l' raviêr. Pîs falu ra.ugner ! pîs fer dès cojês ! Après, i falot v'nu tchèrier su dès tchèrètes à deûs rûes, paç' quu t' n'auros seû catoûrner avaurlà avu dès tchaurs à quate rûes. Et lès tch'vaus qu'astint quausu rafachés pa dès tchacossês d' mouches èt qu' astint mougnés paus tayans. Èt nin co lès p'tits tayans d' maujon, là: dès gros tayans du tch'vau quausu tossi gros qu'ène pitite baloûje. Aus tch'vaus, on l'zî d'vot mète du 1' nwâre graîsse su la crinîre èt su l' quawî pou tchèsser cès laîdes man.nètes biêsses-là. Quand dj' astos èfant, yink dès prèmîs-ovradjes qu'on nous d'not quand on z-alot tchèrier ou fûr du pré, ç'astot d' mouchier lu tch'vau avu ène sutwârtchète û in fouyê. Paç'quu t'avos dès djon.nes tchuvaus, quand il astint ataqués paus tayans, is s'aurint co bin yu awaré. Ç'astot in plan pou spanseler tchèrète èt tchèretêye.
— Èt l' rêwadje dins tout ça ?
— Bin ratind in pô, don, twè, pou in p'tit wèspiant ! On put z-èsse curieûs sins z-èsse kitchot. T'ès toudi dandjî d' counuche lès pondants èt lès djondants d'ène afère pou la bin polu comprinre. Lu rêwadje va avu lu f'nau dès prés come lu cornî va avu la pîre à fau.
— Nu v's-amwaîjichèz nin, ô, non.nonke. Dju n' dijos nin ça pou mau dîre.
— I gn-è rin avu ça, hê. Jusse dju dis qu'i faut 'nn' aler à s'n-auje èt à fwaît. I gn-è pont d' avance du sèmer d'vant d'awèr ringuié. (…) On dustoûrnot l'êwe ou rés' du l' gârgouye qu'èst s' lès prés du l' Falwâche. Du-d-là, on z-avot bauti deûs bîs d' rêwadje, du tchèque costé du mwaîsse rî. Quu, dès côps, lès bîs d' rêwadje su p'lint co r'partadjer pus lon. Çu côp-là, su tchèque pré, on-avot sté foyer dès p'tits bîchons pou l'êwe couru dès bîs d' rêwadje su l' tchamp.
- On rêwot insi l'anêye au long ?
- Non. nè, hin; çu n'astot qu'à l' rèchûe d' l'iviêr qu'on plot z-apougner ç't-ovradje-là. I n' falot nin rêwer trop matin dins l'anêye, ca adon, l'êwe aurot yu adjalé su l' pré. On rêwot… d'jans: dudpîs lu r'lignadje jusqu'à d'vant qu' lès-êwes nu su r'tirinche: du mwès d' mârs jusqu'ou mwès d' jun, qwè.
- On bârot mwaîsse bî tout-oûte ?
- Nèni, don; ôtrumint on l'aurot yu spoûjé, èt ça, ça n' su plot. I gn-avot ène pale pou régler l' dèbit inte lu mwaîsse bî èt lès bîs d' rêwadje. Ene pale, ç'astot dès grandes laudjes plantches qu'arètint ène paurtîye d' l'êwe. I gn-avot in piler d' tchèque costé du bî, avu in batchê pou z-î stiker lès pales. On z-è mètot deûs û qu' c'èst trwâs, là. I gn-avot ène tchin.ne après tchèque pale, èt on lès-agritchot dins èn-ènê mètu èsprès su l' duzeûs du piler. A l'èsté, on lèyot tout bin bonemint ène plantche avu ène grosse pîre ou d'zous. Pîs ç' côp-là, quand l'êwe astot mètûye, pou l'awèr su s' tchamp, on f'jot in p'tit bâradje ou d'bout du pré avu ène grosse pîre, èt on tchôkot dès wazons inte la pîre èt l' bwârd du rîchê. Pus ç' quu t' bâradje astot bin fwaît, pus ç' qu'i gn-è courot d'êwe su t' pré. Et on la rustramot co a la boulant pattavau avu ène grande râclète, pou qu' toutes lès places soyinche bin r'moyêyes. On-è profitot pou staurer lès framonjîs èt tirer lès pîres vôye fû du tchamp. D'alieûrs, souvint, l'êwe moussot dins les tèrêyes dès fougnants. Ça fwait qu'èle russôtot dins ène framoûje, come si ç'aurot yu sté in choûrd.
- Maîs, si on-arètot toute l' êwe, i gn-è d'mèrot pupont pou l' vèjin !
- A ! v'là r noeûd, di-st-i 1' soyeûs ! Quand t' causes du rêwadje tu causes du margaye. Ç'astot toudi ou cé qui profiterot d' l'êwe du pus quu l's-ôtes. Quand i gn-è v'not ène bone drache - ène lavausse corne on dit à Faumène, èt i gn-è n-è souvint, don, à ç' saîson-là, avu les vês d' mars èt lès biquèts d'avri-, t' è wèyos qu'apicint lu hawê, qui s'amantchint in grand satch su l' dos pou n' nin z-èsse frèchis, èt hay èvôye après la Praîrîye ! On lès loumot lès hapeûs d'êwe. S'is s' p'lint mète d'acwârd inte zês, ç'astot l' bon, maîs is s' chamayint souvint paç' quu yink avot arèté in pô d' pus d'êwe quu l'ôte. Et pa dès côps qu'il s' pingnint, èt s' rudinguer à côps d' hawê. T'avos lès pus vîs qu'astint pus malins, là, zês. Il alint djouwer aus cautes jusqu'à onze eûres, mînut', pîs, la chîje oûte, is vôrint vitemint après leûs bokèts d' pré. A passant, il avint sougne du dusbrôler in pô l'arèt du cé qu'astot su leû d'zeûs: is fjint in pô ca.osser la pîre pou qu' lès wazons s' dussotlinche. Pîs ç' côp-là, is s'amantchint in bê-z-èt stokas′ bâradje pou leû pré. Lu cé qu'astot mètu pa-d'zous avot toudi la couye pou ç' nutîye-là. Èt bin i wêtot du s' ruvindjer lu londemwin, là. C'èst pou ça qu' ç'astot souvint higne èt bagne inte vèjins.
- Maîs si l' bî d' rêwadje astot spoûjé s' lu d'zous, lès pèchons alint crèver !
- On n' plot bin mau d' lès laîre crèver, va. On l'zî fjot awèr ène doûce mwârt. Du côp qu' l'êwe bachot, on r'loukot dins lès fonds èt on wèyot lès trûtes qui ramichint. I lèzi falot gatier l' vinte tout doûcemint. Adon, èles su lèyint v'nu dins vosse mwin. Avu l'ôte mwin, on l'zi r'montot tout bê doûcètemint vè la tiêsse, èt, d'in plin côp, on l'zî stikot lès deûs dègts dins lès-orèyes. À ç' moumint-là, èles n'aurint pus seû v' chiper fû dès mwins. Note bin quu ç' n'astot nin dès trûtes come lès cés d'asteûre, sés', qu'ont la tiêsse come mu pougne èt cwârps come mu peûce. Cèt-lales, èlles astint fines crausses. On avot sougne du lès stiker pad'zous la tch'mîje pou z-è raler à l' maujon, pou si pa dès côps on-aurot yu rascontré gârde. On z-atrapot co bin ossi d's-ôtes pèchons: dès pèrtches, dès tch'vènes, dès bârbês, èt nin come dès tchacaus, sés′.
- Ça d'vot fé dès rudes fricassêyes. Çu n'astot nin s'apinse qu'on dit mougner dès grèvîyes, là, ça.
- O-w-ây çu côp-là. On-astot bin r'paché pou sès pon.nes.
- Ç' quu dju n' comprind nin, mi, c'èst pouqwè qu'on-avot dandjî d' mète l'êwe su lès tchamps dins cès payis-ci, û c' qu'i plût quausu toute l'anêye.
- Ây maîs non pus, come à Transine, lès prés, il astint su l' tiêne, ça vut dîre su l' sètch: l'êwe du plûve rîchelot t't-à valêye èt n' ranêwot wêre la tère. Pîs co: l'êwe du rêwadje, èle prov'not du viadje. Avu l' bigau qui sûnot fû dès pautches, avu lès flates du-d-pattavau lès vôyes, ç'astot in fâmeûs angraîs, là, ça, valèt. Et du ç' timps-là, i gn-avot pont d' savon èt d' chimiquerîyes dins lès-êwes du maujon. L'êwe du tèchon, on n' la voûdot nin d'djà ou sêweû, parèt: on la d'not aus couchès. Dj'auros volu qu' t'auros veû lès tchèrêyes du fûr quu t' sôrtos fû dès prèmîs prés après l' viadje. Ç'astot aujî à comprinde, don: c'èst zês qu'astint lès mîs acrachés paus-êwes d'ansinî.
- Pouqwè qu' z-onz dit come à Transine ? Ç' n'astot nin partout parèy ?
- Là co yauk, là. T'ès come Viance, lès prés qui vont d' Naurandour èt d' Rèbèfwè jusqu'à l'êwe du Lèsse, is sont quausu tout su l' plat. Dins 1' timps, ç'astot toutes fagnes. C'èst pou ça qu'on z-è creûsé la Watringue èt qu'on z-è fwaît la pale ou Lignerî pou dustoûrner l'êwe. C'èst l' min.me sistème qu'à Transine maîs c'èst tostant pou sêwer qu' pou rêwer. C'èst co parèy après Nûvier èt dins tout l' payis du Tchèstê.
- Et à l'èsté, on n' rêwot pus ?
- Non. D'alieûr, i gn-avot puche d'êwe dins lès bîs d' rêwadje. On z-astot quite d'aler haper l'êwe pou jusqù'après l'iviêr. Adon i falot 'nn'aler rul'ver lès bîs d' rêwadje èt r'foyer lès coûrotes. Paç' quu, timps d' l'èsté, i gn-avot créchu dès pèklêyes d'iêbes du bî plin, èt èlles astint griblêyes du mousserês èt d' djonkês. I lès falot aler tayer avu ène hatche du pré: ç'astot ène hatche avu in grand arondi tayant. Et pîs, i falot co qu' tous lès bîs soyinche rul'vés duvant du polu r'mète l'êwe.
- Et qu'èst ç' qu'il ont duv'nu, cès bîs-là, il ont sté r'catchés ?
- Non.né, hé, on lès put co vèy à dès places qu'i gn-è. T'ès souvint in câré d' sapins qu'ont sté r'plantés su 1' pré; pa-d'zeûs, t'ès la virêye qu'astot s' la coupète du tiêne; èt inte lès deûs, t'ès in p'tit tchènau: ç'astot bî d' rêwadje. Bin chûr, asteûre, il èst rimpli d' fouyes èt d' tère qu'ont r'groûlé djus dès ôrîs du bî pîsqu'on n' lès-è pus sté rul'ver. (…) Tès pôpîres ossi, i lès faurot bin rul'ver pou qu' tu wèches co clér, là, twè. Alêz, dj'îrans rêver dès bîs èt dès bîchons.