Hir avou Jâcques et Nanèsse,
Jôseph et Hinri,
A champ po fer n’pitite fiesse
Nos allîs cori !
Mon Dièw comme on s’amusa !
Zim lon laire, zim lon la !
Zim lon laire, zim lon la !
Ah ! ha, ha !
Nos corîs d’vins les prairèye,
Les prés, les cortis,
Nos minîs n’vèye sins parèye
Nos fis l’assoti !
On riéve à toumer là !
Zym lon laire, etc.
Tot d’on côp l’joyeuse niêye,
Fat st-on crâmignon.
On s’sûva chègne à cowêye
Riant tot dè long.
Oh ! tot l’plaisir qu’on s’dina,
Zim lon laine, etc.
Min volà qui d’vins n’belle plèce
On fait st-arrester.
Jôseph apougna Nanèsse
Et v’s’èl fat poch’ter
Tot l’monde adon cancana,
Zim lon laire, etc.
Après cisse clapante quadrille,
On polka turtos
Nolu ni d’manéve tranquille,
Tot l’monde féve li sot !
Min d’on côp ji m’sitâra !
Zim lon laire, etc.
Qwand c’est qu’is m’vèyît toumèye
Tos ces foèrsaulés,
Atou d’mi qu’esteut pâmêye
Vinît tourniquer
Et dansît tot comme çoula…
Zim lon laire, etc.
Di cisse journèye sins parêye,
On r’rissovinrè,
Paur qui bin vite, à l’mairèye,
Ji pinse qu’on m’monrè.
On dans’rè co bin ç’joû-là.
Zim lon laire, etc.