2. La cause
C’è-st-ène mouche, û putot deûx sôrtes du mouches. On les loume Hypoderma linatus èt Hypoderma bovis. On les rensconture toutes les deûx dins tout l’ payis, mais on pu dîre qu la prèmîre, on la trouve pus souvint en Flande èt la deûjime surtout p’avauci en Ardènes. Hypoderma linatus, c’èst lu p’tit warabê èt Hypoderma bovis, lu grand warabê. Lu nom d’ Hypoderma en latin, vu dîre qu la biêsse su stike pa-d’zous la pê. Timps qu’ dj’î sondje, dju vous d’mande du n’ nin roviyér d’ soulignér tous les noms latins des biêsses. C’ èst l’aladje inlà (c’èst come ça k’ ça s’ fwèt toudis).
Pou ruvnu à nosse mouche, dj’alans sîre sa vîye en paurtant d’ l’û jusqu’à l’ meûre mouche. Ca c’èst in pon diffèrent pou lu grand èt lu p’tit warabê.
La mouche è 15 mm du long, à in poy près, qwè. Ele nu vole qu quand i fwèt in pon tchô (ça vut dîre au mwins 17 dègrés). La mouche è ène vraî ôse-du-solê, çu qui s’ loume héliotropisme positif. In côp qu’i gn-è vint ène loukêye du solê, èle su ravèye èt vole vôye. C’èst bin d’hazard si èle nu rensconture nin ène vatche, pîsqu’èle è rèchu fû du s’ ratortchadje (qu’on loume cocon) à l’ place û c’ qu’èle avot tumé come warabê. Quand les biêsses la wèyèt èt l’oyèt, èle su d’mèfièt. Pas’qu çu mouche là è in vol qu’on r’counirot inte mile, telmint i-l-è pèsant, trin.nant, èt qu’i mon.ne èn odaule zûnadje. Ça r’san.ne in pon à ène baloûche.
Les vatches ont deûx façons d’ fer quand èles oyèt la mouche. La prèmîre, c’èst du s’ mète à l’ qwète à l’ombrîre d’in-aube. I gn-è qu’ les vîs vatches, qui counichèt l’ manèje, qui fjèt ainsi. Les djon.nes vatches, les djon.nes biêsses èt les vês vont putot su s’barer èt s’ awarer. Adon, èles cumincèt à couru d’ tous costés avu la quawe à l’air. On dit qu’ les vatches bizèt.
Rin qu’ pou ça, la maladîye est mwaiche pou l’èconomîye du l’ since. D’abôrd, les vatches qui bizèt û qui s’ mètèt a l’ qwète nu mougnèt nin èt à l’ nute, ça su r’sintrèt su les lites du laçê. La vatche rutire toudi bin d’ 2-3 lites. Et pîs, quand ène biêsse bize, èle duvint come sote, èt ça pu ariver qu’èle va bonrer dins les clotures èt les chalètes, èt s’ fwèt k’chèrer partout, mais surtout ou rés du pis. Et dju pu bin v’ dîre qu les chèraudes du pis sont malaujîtes à rakeûde. Et èle n’est nin à traire au mwins quinze djoûrs au long. Vlà dja ène bone raison pou wêter du s’ mète quite du ç’ mau-là.
Bon ! Maugré qu’ les biêsses su dusfindèt en courant vôye, la mouche parvint à ponre quéques-ûs al pate du poy. Ça s’ passe en plin esté, du mwès d’ jun ou mwès d’ sètembe.
Les ûs vont dusclôre du côp, et les djon.nes tchalons vont passer d’ triviê du l’ pê d’ zês-min.mes. Is vont quèru après in p’tit niêr èt vont r’monter bin paujîremint jusqu’à l’ chine du dos. Après quate mwès, is moussèt dins l’ tron du l’ chine, èt vont s’ tchonker atur la miyaule èt l’ochê. Is d’mèrèt ascwatis la-dlé quéques sumwin.nes au long.
A counuche la vîye èt les perlinadjes des oulines, on pu comprinde les ôtes piêtes qu la maladîye va n-unn’ esse la cause :
a) quand l’ tchalon est mètu dins l’ trô du l’ chine, i pu, pou ène raison û ène ôte, sôye-ti î crèver, sôye-ti amon.ner du l’ misére, et i s’ fwèt èn abcès. Adon, la mwale va esse djondue, èt la biêsse va tumér flauwe, pac’ qu la mwale è s’té spotchêye inte l’ochê èt l’abcès. La vatche què aflijêye du ça, c’est èn ojê pou l’ tchèt. I gn è pont d’avance du wêter d’ la médier. I vaut mî l’avoyer a l’abatadje.
b) a r’montant du l’ colone jusqu’ou d’zous d’ la pê du dos, les oulines traversèt la tchaur a biftèk, yink des meyeus boquet su toute la cârcasse. Ele plèt y laichu des marques qui vont rabacher la qualité dul tchaur.
c) a l’ fin, tous les trons qu les warabês – dj’ê rovié du vs dire qu çu k’ on loume « warabê », c’ est d’abôrd la trwâjime ouline, la cé k’est pa d’zous la pê – les trôs qu’i f’jèt pou rèchu vont k’chèrer l’ cûr du l’ biêsse. Et lu cûr vauret bramint mwinsse pou z èsse tané. Ou ducepêceladje, les cûrs sont ttaleure come des passètes. Çu n’est k’ ça si les pêcelîs nu l’ foutèt nin vôye.