Wikisourd:Depot/Lucyin/Li djonne sôdår

Èn årtike di Wikisource.
Racsegnes sol tecse metou dvins l’ depot
Tite Li djonne sôdår
Oteur Augustin Vermer
Date do scrijhaedje
(do ratournaedje, do rortografiaedje, evnd.)
Date d’ eplaidaedje
(so Wikisourd)
Depôzitaire Lucyin
Info rortografiaedje da Lucyin Mahin, e rfondou walon
Li djonne sôdår

On djonne sôdår k’ on cmandéve po l’ årmêye
Cwitéve Biarin.
E sospirant, i djheut a s’ binamêye
« Dj’ so bén tchagrin
Dji pied les djambes, dji n’ sårè monter l’ tiene
Dj’ a l’ cour si ptit,
A ! Si bénrade, dji n’ rivén a l’ Fåmene
I m’ fåt mori. »

Etot rwaitant li clotchî di s’ viyaedje,
I somadjive.
Et co cint côps å cminçmint di s’ voyaedje
I s’ ritournéve.
« Vola, djheut i, mi måjhone et vla l’ sinne
Brait ele ossu ?
A ! Si bénrade, dji n’ rivén a l’ Fåmene
I m’ fåt mori. »

Å dbout d’ kéke tins, i sondjive ki s’ mwaitresse
L’ aveut rovyî
Et l’ pôve valèt, i nd åreut pierdou l’ tiesse
Ou-z è lanwi.
Mins on bea djoû, ele li vna tirer d’ poenne
Elle aveut scrît
« A ! Si bénrade, dji n’ rivén a l’ Fåmene
I m’ fåt mori. »

Vo l’ la, so l’ côp après awè lî s’ lete
Tot ragaiyi.
A l’ egzercice, i cmincive a s’ rimete
Avou plaijhi.
« Dj’ årè, di-st i, cwand mi masse serè plinne
Kékes djoûs d’ condji.
Et dj’ erirè fé on toû a l’ Fåmene
Po n’ nén mori. »

Pout esse tchanté so l’ air « Gastibelza ».