Li crition èt l’ frumihe
On crition qu’aveût tchanté tot l’osté
Si trova fwért dihèssî
Qwand l’ bîhe èl vina hagnî.
I n’aveût nin ine miyète
D’on p’tit warbå ni d’ mohète.
Il ala brêre li famène
Amon l’ frumihe si vwèzène
Tot lî d’hant di lî pruster
Quéque rèstant po vicoter
Tot ratindant l’ ôte annêye.
Dji v’ pay’rè, savez, mamêye ;
Divant l’awous’, so m’ parole
Vos rårez tot, ou l’ diåle m’èvole.
Les frumihes ni prustèt rin
Ç’ n’èst nin leû pètchî, vormint.
— Vos v’nez, dit-st-èle, po m’acreûre ;
Qui fîz v’ divins lès tcholeûrs ?
— Nut’ èt djoû, dji féve dè brut
Qui c’èsteût on vrêy disdut.
— Vos tchantîz, dj’ è sos binåhe
À ç’t’eûre, dansez à voste åhe.