Volà dèdjà bén on momint qui dj’aveû-st-è l’idéye qui m’fème mi trompeûve. On djoû, dji m’dis : dj’èl va-st-apicî ; dji rabroke èl mohone à deûs eûres ô diner èt d’èl trouve tote nouwe sus l’lèt.
Nos y èstons !
Dji r’bate tote li mohone po trover l’coupåbe, min s rén à fer ; i n’èst catchi nule pô, …à mwins qu’è maf ! i n’a-st-an-èfèt eune pitite bawète qui done sus li d’drî dèl mohone.
Dji monte è gèrnî, dji mousse è maf èt dji toume sus eune ome qu’ésteût pindu å bward dèl bawète.
Dji prind on mårtia èt dji latte sus sès deûts diska tont qu’i lache prise èt qu’i toume sus l’pavéye. Mins i n’èsteût nén tot-à-fêt mwart.
Di rage qui dj’èsteû, dji prind l’frigo dèl couhine èt dji lî sprotche sus l’tièsse… èt c’èst-st-adon qui dj’a fêt eune crise cardiake, èndon binamé Sint-Pière.
— Si n’èst nén lès pwin.nes dè m’vinu raconter çou qui s’a passé, disti Sint-Pière, dj’ tot vèyu. Mins, c’èst bon insi, lés wyèmes polèt-st-intrer è Paradis.
Eune miète après, volà eune ome qu’arive èt qui raconte à Sint-Pière çou qui vént di lî ariver.
— Figurève, disti, qui dj’èsteû en trin dè r’mète deûs-st-treûs panes sus l’teût da Mèlanie, quond l’tchén dèl cinse a fêt toumer l’håle ; dji m’aveû bén rapicî al bawète dè maf, mins l’cinsi a passé d’sus mès mwins èt m’a språtchî lés deûts avou on gros mårtia. On rêud sot, i bouheûve come eune arèdjî ; dj’a toumé sus l’pavéye, èt là, l’cinsî m’a-st-achèvé tot bouhant sus m’tièsse avou l’ frigo dèl mohone. Eune vrèye bièsse dislayîhe…
— Oye, disti Sint-Pière, dj’a-st-intindu c’t-afêre-là. C’èst bon, lès victimes dès criminéls polèt-st-intrer è Paradis.
Volà on treûzème ome qu’arive èt qui vout ataker à raconter à Sint-Pière çou qui lî a-st-arivé :
— Mi, franch’mint, dji n’î comprind todi rén, dji n’sé nén kimint qu’tot çà èst-st-arivé : dj’èsteû catchî tot nu d’vint on frigo….
— Ça va, disti St-Pière, on m’ la dèdjà raconté….