C’ esteut e 1981; dji m’ è sovén co come d’ enute. Dj’ esteu co e scole (infén, dji fjheu prezince !). Mins dji lijheu ddja voltî les gazetes. C’ est insi ki…
Dins li rvuwe « Pourquoi pas » (mot po mot : Pocwè nén ?), on pleut lére èn årtike sol discoviete di bråmint des coirs eterés a Sint-Houbert.
Tolmonde esteut foirt sipitant, ca on rastårdjive do vey si l’ coir do grand sint esteut la. Ci fourit ene coûte djoye ca, s’ i gn aveut bén les coirs di 50 abés di l’ abeye (k’ a stî basteye e 7inme sieke), li ci do sint patron mankéve.
Ça fwait k’ les djins ont todi cweri après.
Mi k’ est on passioné d’ istwere, e cwerant, e rcôpant des scrijhaedjes et des vîs papîs egurniyîs låvå, dj’ aveu dins l’ idêye ki l’ sint ome aveut stî eteré e dominne d’ Hourtubijhe.
Paski pocwè ? Paski, dins les scrijhaedjes, on pleut lére ki l’ ome aveut stî eteré dins on moustî. Mins nerén, li seu moustî k’ i n’ av avår la di ces trevéns la, c’ esteut bén Hourtubijhe. Li bastimint addé li bazeke1, c’ esteut on palå po les abés ki moennént l’ abeye.
Li moustî d’ Hourtubijhe date do tins da Plectrou, li feme da Pepin l’ Peutchet, ki s’ aveut disrindjî ey adon, esse reclôse e fén mitan des bwès d’ l’ Årdene po-z î fé penitince.
On a eto tuzé ki l’ sint åreut polou esse eteré e tchestea d’ Deulin (dé Oufet).
Dj’ a yeu del tchance, on djoû, di rescontrer Jules Brunin. Kî k’ c’ est, ci ome la ? Estant gamén, il aveut stî reclôs å penitincî (prijhon po les djonnes ki sont co mineurs). Dji vs cåze do vî penitincî, k’ esteut metou djusse padrî l’ bazeke.
Nos fåt rmonter ås anêyes 1950. Li gamén aveut stî codåné a l’ ådje di 7 ans pask’ il aveut hapé ene peme. Ey å penitincî, gn aveut des wårdeus ki margougnént les efants, fizicmint et secsuwelmint.
L’ afwaire a stî racontêye pa ç’ djin la – Jules Brunin, dabôrd – e-n on live ki l’ tite, c’ est « L’enfer des gosses » (l’ infier des crapåds). Mins cwand l’ afwaire a passé dvant les tribunås (ås ouxhs clôs), elle a bråmint stî stofêye paski ces djins la avént sovint l’ bresse long.
Item est i ki nosse Djule a sayî d’ peter å diåle del prijhon. Il aveut prins on tchmin soterén k’ aléve del prijhon al bazeke tot passant pa les cåves. A on moumint dné di s’ coraedje-evoye, e trevåtchant ene des cåves, il aveut passé a costé des cadåves di ses cpagnons disparexhous. Gn aveut des cis k’ estént a chnouf, mins end aveut co des frisses. Mins il aveut ossu veyou, å fond d’ ene tchambe sol costé, on coir ki shonnéve n’ aveur nén bodjî mågré les anêyes.
Naturelmint, li gamén n’ s’ a nén aresté po vey cwè. Il a corou evoye di ses pus roeds.
Dispu don, dji so seur ki l’ coir da sint Houbert si trove bén dins les cåves del bazeke, dins ene cripe, come nos djhans asteure po ces spireas la metou so les costés d’ on soterén.
Li hik di l’ istwere, c’ est ki ci cripe la a stî clôse po do bon.
Dispu cénk anêyes, dji dmande a tot bottchamp ås minisses del Walonreye po-z aveur li droet di rdrovi l’ cripe. Mins, come dit pus hôt, gn a des haldepîs et do frinnaedje des cwate pates et do muzea po n’ nén mete a må les zwers des wårdeus k’ avént fwait do toirt ås efants.
Çoula est foirt damadje, ca l’ veye åreut bén dandjî d’ on bon scoupe come ça po rdressî s’ tourisse. Li passaedje des scolites dins les bwès ont fwait grand toirt ås finances del comene, sins conter li minêye ki nos a-st emîlé tertos.
Dji waitrè di fé aveur ciste otorizåcion la ås rcwereus ey istoryins, divant d’ mori. Po l’ oneur del veye et pol kinoxhance di nosse patrimoenne, dji dvans saveur cwè.
sicrît li 30 di may; dins l' modêye papî, gn a kékes målåjheys mots ki sont ratournés e francès.