Li nid est vûde ! come i fait trisse,
Come i fait frèd dins nosse maujo !
Au cœûr, dji sins l'chagrén qui m' pice.
Qui n' sont-is co véci tortos !
Et pourtant, dj'è n-n'a yeû des pwinnes,
Et des coléres èt des dispits
Qui m' fyénn't boûre li son dins les winnes.
Mins dj'a yeû tant d'plaiji ossi !
Dj'a viké, qwè ! C'est nosse planète
Di n' wére rîre èt d' soufri branmint.
Mins pourtant, su m' pôve vîye anète,
I gna des djoûs qu' ça pèse crân'mint.
Ewou estôz Djan èt Monique ?
Et vos Paul ? Et mi p'tit André ?
Alons, riv'noz qui l'maujo r'vique
Come dins l' timps quand nos… Intrez
Alons, vola co l' fîve qui monte,
Come chaque côp qui dj' vous trop sondjî,
Et cor in côp m' cœûr qui s'ènonde.
André, vos m' vièroz sins taurdjî.
Po l' z-ôtes, dji crwès qu'dj'a fait mi d'vwèr;
Is n'ont bén sûr pus dandjî d'mi.
Qwè-ce qui dj' fais co véci d'sus l' terre,
Pusqui l'-z-èfants sont foû do nid ?
Tote ène Vîye (CW1940)/XXVIII
28
Tote ène Vîye, Les Cahiers Wallons lº 32,
Li nid est vûde