Dj' a des r'proches à vos fé à tortos mes tayons !
A vos l'mére di m' Parén. Au viladje d'Aursumont,
Les djins vos surloménn't inte zels li mére des pauves;
Gn'avait tofère ène place po l'bribeû à vosse tauve.
Et puis à vo, Grand-Pére. Passé quatrè-véngts ans,
Vos avîz co li r'gârd èt l'sorîre d'èn-èfant.
Dji sais bén qu'vosse consyince, comme li leûr estait drwète;
Des faustrîyes èt des mintes, vos n'con'chîz nén l'creûjète.
A vos ossi Papa. Poqwè m'avôz appris
A djouwer sins trichî ? L'honneûr ça n'a pont d'prix ?
I n' faut jamais rén fé qu'èn honète homme mèprîje ?
Vos d'djîz ça, èt pourtant, d'abôrd noûve côps sus dîje,
Les dgins, tot autoû d' nos sont laches, mèchants, soûrnwès;
Tos les moyéns sont bons, on n'riwète nén au chwè;
Les ambitieux guignenut n'impôrte quine avizance
Po disclitchî al piesse li djambon qu'y balance.
Pwîs cor à vos Moman. Vos m' avoz rèpèté
Qu'i faut yesse doux et bon et todis pârdoner.
A v'vôy, à vos choûter, vos m'avoz fait acrwère
Qu'i n'faut jamais, dzos s'nez, balancî l'ècinswère.
N'est-ce nén vos autes li cause qui dj'sos-st-èn înocint
Qui s'a liyî passer sus les pîds trop sovint,
Sins sawè s'mète jamais à r'bouter grète po grète
Ni à r'taper les fions comme on l'dwèt : al tach'lète ?
Ah comme dji vos l'riproche di m'awè fait ç'qui dj'sos,
Avou in caractére qui m' fait prinde po in sot !
Dji vauréve tant ossi awè l'toûr di m'disfinde,
Sawè ratchî m'vénin, awè l'coradje di tinde
Comme in tchet aux mouchons, po trouver en dèfaut
Li cén qui s'met dins m'vôye et saye di m' fé do mau.
Pusqu'i gna pont d' pârdon po les brigans dins l'vîye,
Bauyau ! saye di t' candjî ! at'toû d'fé les lostrîyes !
Vante-tu, trin-ne-tu sus t'vinte et s'i faut, tape des broûs
Ecinse li cén qu't'aiderè; quî qui t'gin-ne, boute lu foû .
Pèstèle tot, rinôye tot ; assaye di yesse mâriole !
Est-ce presse ? Ti cœûr est d' pîre ? Non ? Bén fais l'caracole !
Si l'waspe lèye si-t-awion dins l'cwachûre qù'elle ti fait,
Arrache-lu, serre tes dints et soufris sins l'mostrer.
Li pli est trop bén pris, dispû trop des anéyes,
Va, toqué ! Continuwe, èt n'brais pus del pasquéye.
Ti duvréves yesse honteux d'awè ôsu sondjî
A r'prochî à tes tôyes l'âme qu'is t'avénn't fwârdjî.
S'is riv'nénn't, was'réves-tu les rwétî dins les oûyes ?
Bache li tiesse, t'as raison. Et n' passe pus dins l'bèrdoûye.
Tote ène Vîye (CW1940)/XXVI
26
Tote ène Vîye, Les Cahiers Wallons lº 32,
Des broûs