D'in vî casaque qui dji n' mets pus
Li moman a fait audjoûrdu,
A fwace di pacyince èt d'travaye
Dispû des heûres qu'èle keûd et taye,
Li premère culote do gamin
Et tote fiére èle l'apèle rad'mint.
Li p'tit qu'est-st'à djouwer aux mayes
Ni vout nin lachî ses cacayes.
Mins les momans ont si bin l'toûr !
Wétîz'l' asteûre come il acoûrt.
Ele n'a yeû qu'à lî dîre: « Abîye !
Come in gamin qui dj'vos rabîye !
Mète ène culote ? Come si papa ?
Do côp, il a tot lèyî là
Et i n'è pout pus qu'on l'disbote,
Qu'on lî assaye si noûve culote.
« Là ène sipinne; ci in bouton.
Ça n' tinkîye pus ? Cor in p'tit pont.
Vla l'afaire faite mi grosse bèdéye.
Wétîz dins l'glace sus l'tchiminéye.
Vlôz qui dj'vos lève ? Vos vièroz mia.
Mâria Dèyi, qui v'z-estoz bia ! »
Mins v'la Moman qu'est tote sondjeûse.
Poqwè a-t -èle l'air si pèneûse ?
I m'chène qui maugré l'contintemint
D'vôye li bouneûr di nosse gamin,
Des lârmes lî vègn'nut dins les ouys ?
Poqwè s'mwin tronne-t-èle come ène fouye
En caressant l'tiesse di l'èfant ?
- Ah! dji lîs dins vosse cœûr, Moman.
Vos n'avoz nén dandjî d' mèl dîre
Poqwè l'lârme frèchit vosse paupîre,
Allez, dj'advine bén vosse tourmint:
Vos l'sintoz d'djà chaper d'vos mwins,
Djan qui fait d'l'homme avou s'culote.
Vos l'vôriz tofère dins vos cotes,
Dè l'vôye crèche vos avoz l'cœûr gros
Pasqu'i n'sèrè pus tant da vos.
Tote ène Vîye (CW1940)/XVI
16
Tote ène Vîye, Les Cahiers Wallons lº 32,
Premère culote