Tchanson ou dialogue inte Dj’han-qui-plôye et Lînète Makêye

Ciste ouve ci egzistêye eto divins ds ôtès ortografeyes : Rifondou walon.

o.n.c.

rortografiaedje da Maurice Piron

« Djo-wâde fèye, djo-wâde brantchète,
vos-èstez todi m’ diamant !
Ni tchante nin co l’âlouwète
qwand v’s-èstez avâ lès tchamps.
Por vos, dj’a todi l′ hikète,
dji n’ pou pus magnî dè pan
si dji n’ vis-a po m’ poyète,
si dji n’ so voste ortolan.

— Ci sont totès colibèt’
qui vos m’ contez, loyâ Dj’han !
Dji so èco trop djônète
po intrèteni dès galants.
Mês dj’a ‘ne sakwè qui m’ toûrmète,
dji creû qu’ c’è-st-on diâle volant
qui fêt qui dj’ so-t-inquiyète,
qui m’ fêt avu l’ trosse-galant !

— C’est l’amor qu’è-st-à l’aguiète :
i fât qu’il âye bin dalant !
C’è-st-ossi lu qui v’ dispiète
qwèqu’i fasse li fâs-dwèrmant.
S’i vout intrer po vosse pwète,
i n’a qu’ fé d’on paze-avant :
qwand ‘l a s’ bonèt à hiyètes
i fêt pés qu’on p’tit volant.

— Vos-avez l′ linwe qui v’ cakète,
qu’èst tot come ine pîre d’êmant;
dj’ô bin à vos tchansonètes
qui v’s-avez lé l’alcoran…
Vos vwèrîz bin di m’ pansète
po magnî avou vosse pan.
Dji so come po brêre « hovelète ! »,
dji n’ m’ègadje nin pus-avant.

— Po ci côp-là, dji m’ va piède,
ou prindez-me po voste amant !
Hoûtez-me don, mi p’tite moulète,
dji so fidéle èt constant.
Si dj’èsteû vosse lamponète,
vos sèrîz m’ mureû ârdant…
Nos djouwerins à l’ rèspounète,
c’èst-on djeû qu’èst si charmant !

— Dji veû bin qu’i fat qu’i pète :
vos-èstez trop complêzant !
Mês si vos-èstez ‘ne trompète,
dji sèrè tambour batant !
Et po rik’nohe nosse houbète,
nos-î mètrans on crèhant…
Dji sèrè todi Lînète
èt vos sèrez todi Dj’han ! »