C’est todi lu ptit qu’on sprantche, dist-i l’ tite du nos’ confèrince d’oûy. C’est don d’on ptit qu’on sprantche quu dju v’ va djâser, à sèpi : lu culture walone è l’ comunôté francèse.
Nos vikans è l’ Belgique fèdèrale on drole d’afêre. Dju n’ vos raprinrè ré tot vos d’hant qu’ nos côptans 3 régions : lu flaminde, lu brussèlwèse èt l’ walone. Nos côptans ossi 3 comunôtés : lu flaminde, lu germanophone, èt l’ francèse. Nu cwèrez né après l’ comunôté walone, i n’a nole. È l’ comunôté francèse, on z-a mahî lès Brussèlwès et lès Walons.
I n’a nou mâ a çoula et c’est bon insi, v’ sôle-ti. Bin djustumint, c’est la qu’ vos v’ roûviyez.
A c’mincemint dèl régionalisation, lès Flaminds n’ volît né dèl région brussèlwèse. È c’ trèvint la, ‘nn’ aveût qu’ po l’ Flande èt po l’ Walon’reye. Si l’ région brussèlwèse n’esteût né ruknohawe politikemint par lès Flaminds, i n aveût tot d’minme one comunôté brussèlwèse avou 90% d’ djâseûs è francès. Par sôlidarité avou zèls, lès politikes èmantchît l’ comunôté francèse.
En 1990 ou 1991, lu Belgique su racrèhe d’one treûzinme région : lu région brussèlwèse. A pârti d’ la, tot d’vreût duvni pus sépe : chake région duvreût-st-avu s’ comunôté : lès Flaminds, l’ comunôté flaminde, lès Brussèlwès, l’ comunôté brussèlwèse et lès Walons, l’ comunôté walone. Tot doû, la, valet ! Lès Brussèlwès n’ sont né d’acwèrd. Por zèls, pârtin l’ comunôté francèse inte lès régions walone et brussèlwèse, çu sèreût dustrûre lu sôlidarité inte Walons et Brussèlwès ; èt ça voreût dîre ossi qu’ lès Walons s’ ruployet so zèls-minmes.
Lès cis qui brèyèt çoula tot avâ ont insi trové deûs bonès rêzons du fé dèl régionalisation dèl comunôté francèse on sudjèt inaduzâbe, tabou direût-on è francès. Si on n’ è djâse pus, ré n’ candjerè et ça vât mî insi, tûzèt-i.
Po nos’ pârt, nos n’ vèyans né poqwè lu ruknohance d’one comunôté walone dustrûreût l’ sôlidarité avou Brussel ; ni poqwè çu sèreût on r’ployedje. Podrî cès bwègnes rêzons la, i nos fât r’trover les vrêyes.
Lu prumîre vrêye rêzon po l’ quéne lès Brusèlwès n’ volèt né 2 comunôtés, c’est qu’ lès 3/4 dès çans sont-st-apwèrtés a l’comunôté francèse par lès walons et qu’ mâgré çoula lès walons n’ont câsî ré a dîre.
Prindans deûs egzimpes :
Mâgré lu vote en 83 par lu consèy dèl comunôté francèse d’on décret so l’acsègnemint dè walon è scale et mâgré qu’on consèy des langues régionales endogènes a stu mètou so pîd en 1990 po loûkî a l’ disfinse dèl langue walone, dju v’ pâye dès tchikes si v’ trovez el Walon’reye, one sucale qu’acsègne lu walon.
A l’ tèlevûzion, c’est co pé. So l’RTBF (f come « francophone », né dobel U come « walon »), po trover one émission è walon, i s’ fât dèdja lèver timpe. So lès tchinnes régionales, lès cisses qui s’ loumet sins rire, « télévision de proximité », c’est co pus pôvriteûs. Pôves nos-ôtes è scale èt a l’télévûzion !
Lu deûzinme vrêye rêzon, c’est qu’ po quéques Brussèlwès, lu Walon’rèye n’egzistêye né. I n’ nos ruknohet nole istwère, nole culture. Lu proûve ènn’ est quu qwand lès Flaminds s’ volet pus flamind, tot l’ môde ènnè dit dè bé, c’est-one avancèye culturele. Qwand lès Walons s’ volèt pus walon, on ’nnè dit dè mâ. C’est on r’ployèdje. Duvins cès côditions, i fât heûre lu comunôté francèse po ‘nnè fé toumer foû one comunôté walone. Sins çoula, lu culture walone est-on oûhê po l’ tchèt.
Mins tot côpte fêt, a l’eûre du l’Europe, esse bé important du dusfinde one culture walone ?
Nos n’ polans rèsponde qu’ayi avou fwèce.
Lu Belgique est régionalizêye, çou qui vout dîre quu lès régions prindèt zèles-minmes câsî totes leûs dècisions économikes. Lu lét d’ l’èconomike, c’est l’ culture. Sins culture régionale, pont d’economike. Poqwè ? Pace qui lès Walons s’ duvèt mète d’acwèrd so on prodjèt d’av’ni po leû région. Po réussi c’ prodjèt, lu Walon’rèye deût-st-ovrer avou one èquipe. One èquipe, c’est on trokê d’ djins qui volet djower èssôle po on minme but. Sins identité culturele, i n’a nole èquipe possibe.
Noyî l’ culture walone come lu fêt l’ comunôté francèse, c’èst èspètchî lès Walons du dèveloper leûs fwèces èconomikes.
Noyî lès Walons èt leû culture n’èst né one sacqwè d’ènocint. Ça chèv’ todi bé one saquî.
Po fini, nos r’bouhans co so l’ clâ tot d’hant qu’ po l’av’ni, l’ Walonrèye su deût fé ruknohe come one comunôté culturele pace qu’èle ènn’ a mèzâhe po poleûr rassonler lès Walons âtou d’on nové prodjet du dèvelop’mint.
N’âyans don pus sègne d’èsse Walon, d’èl dîre, d’èl fé savu èt d’ dusfinde tot çou qui fêt qu’ nos èstans nos-ôtes, come lu langue walone.
Walons todi ! l’ Walon’rèye po tot ! Djâsans walon !
Tecse eplaidî pa Lucyin Mahin, ezès tecses do raploû « C’ est todi li ptit k’ on spotche — culteure ey economeye — » k’ il adjinçna a Rdoû, li 12 d’ octôbe 1997.