C'est çu k' nosse mame nos djheut cwand on cåzeuve timp del marinde [repas de midi] u do soper.
C'e-st ossi, sapinse Gui Payotin, directeur di l'Estitut di Rcwerance Agricole di France (INRA) è-n on live ki vent d' vûdi aemon Fayard, çu ki les fieus d' amagnis [fabricants de produits alimentaires] nos djhet tot nos prezintant leu cujhene epactéye u ebocléye [mise en bocaux, en conserve].
Sacwant grames di diyoccene, d'intibiyotikes, u on ptit vîruss des sotès vatches did pu u did moens, ça n'a måy tuwè nolu, ô, vos, erdalet i les boss di l'agrowalimintaire, francs come Batisse.
I nos frin ben magni del vatche aredjeye ces-la ! Ci n'est nen po balter. Din tos les torteas po les biesses [aliments pour bétail], gn a ben 2-3 åcint di farene di tchå, k'a sti fwaite, po ene påt, avu des crevéyès vatches.
C'est ddja ça k'aveut enondè li herlime-herlame [scandale] del maladeye des sotès vatches : des bedots malådes d'ene maladeye des niers, li schôpia-tronnica [démangeaison-tremblements] avint sti cobroyis eyet leu farene metuwe din des pasteures [provende, aliments pour bétail].
Li vîruss s'aveut dispiertè din les vatches et les djins ki magnint do bû [bœuf] si plint epestiferer avu ene rascråwe ki s'aleut mete e leu miyôle [moelle épinière] et lezî dner li maladeye di Croesfel-Djåcob, ene sôre di polio.
Asteure, çu k'on-z a trovè din des cokeas, c'est del dioccene on produt disfoyant, ki lz Amerikins avint aruzè [arrosé] les bwès do Vietnam avu, po fé rexhe les Vietcongs fû d' leus muchetes [caches].
Min pa ké sint eski cisse rascråwe la a-st avnu el Beljike ?
Po cminci, dijhans lu platkizag, c'est les Flaminds, nen les Walons, ki sont d' cåze di tot ci disdut la. Totes les grossès poytreyes son-st edjîstréyes [localisées] el Flande. Li cokea produt el Flande rivint a 27 francs do kilo; il e-st aclevè [élevé] din des nûzomes båtumints, djusca 100 000 biesses pa cinse, et co hay, 10 cokeas å mète cårè, et i peze dipu d' deus kilo a on moe èt dmey.
El Walonreye, les poytreyes k'on-z a-st amontè lanawaire, c'est po-z endè rexhe do cokea d' cinse, u poulet label, sapinse k'on n' dit. On n' put nen avu dipu d' 10 000 ujheas (oûhê, oujê, ouja) [oiseau] pa cinse. I n' sont nen si tant ecassi onk so l'ote come des rolmops din-n on bocå : 3 a 5 å mete cårè. On n' les tuwe k'a troe moes, k'i pezet ben troe kilos. Ça fwait k'i sont branmint moens poûssis, min s' rivnet i pu tchir, avu : 56 francs do kilo.
Po sifwaitmint poûssi les cokeas flaminds, on radjute del cråxhe (2-3 åcints) din leu-z amagni. Ça put yesse do shû (sû, chû, chî, sî) [suif] min eto del cråxhe di balinne, do seyin [saindoux], di l' ôle di pexhon, et vos nd åroz.
Et l' diyoccene, leye, comint çk'elle a-st avnu din ces craxhes la ?
Li Beldjike, c'e-st LI payi åzès fritches [pommes de terre frites], c'est ben cnoxhu. Vos savoz ben eto ki cwand on-z a fwait deus troe cûtéyes avu, l'ôle di friteure n'est pu bune, dowô ? Al plaece d'el fote o saiwoe (sêweû, sêwoû) [égout], on l' raloweye [récupérer, recycler] din les amagnis po les biesses. Djusk'asteure, gn a ren d' må avu ça. Les vîs Walons, eto, estin po li spårgnance.
Min la, wai, l' nuk, di-st i l' soyeu, s' i gn a on tursiveus k'a metu di l'ôle di vûdindje d'ene machine el plaece del casroléye d'ôle di fritches ? C'est pu tchir payi, to sins ben !
Din les ôles di vûdindje des transfos d'ujhene, gn a des pwezons k'on lome piralinnes [pyralènes].
On les ricnoxhe åjheymint din lz analisses, et les martchands d' craxhes po les torteas [graisses pour alimentation animale] divet fé corwaiti tos les noveas arivaedjes d'ôle di friteure k'i rçujhet.
I n' l'ont nen fwait. Li govienmint, neren, n'a nen ricnoxhu vite assèz k'i gn aveut yåk di riskeus [quelque chose de dangereux] dins totes les trichôdreyes des martchands d' farenes, et anonci l' cayet ås ôtes payis d' Urope.
Enute [aujourd'hui], todi come todi, c'est les ptits cinsis ki poirtet l' dôléye [qui sont les boucs émissaires]. Tiroz vosse plan sin mi, a-t i dit l' gros Dehaene to-z eralant din ses waibes avu ses oreyes e baxhete.
Asteure, nos fåt i, a cåze di ça, espaitchi tos les aclevaedjes edustriyels u, al bune [à tout le moins], nelzi nen leyi afôrer [affourager] des crevéyès biesses ås porceas et ås cokeas ?
Oyi, min li grande admetance [dogme] del sôcietè capitalistiveuse k'on vike didin, c'est k'i fåt wangni li dpu possibe. Adon, il est reki di n' ren coschurer ni ctaper [gaspiller], po produre li meyeu martchi k'i s' put ; eyet, sujhanmint, vinde dipu k' les eturlûtants [concurrents].
Fåreut purade ki les aloweus [consommateurs] candjinxhe pår leus abitudes et bin vlu magni pu tchir min meyeu et pu haiti [sain]. Come les produts biyos, metans. Vo t'e la, wai, des cis ki s' frotet les mwins di tot l' deram [remue-ménage] åtoû del diyoccene.
End a todi onk po s' rafyi cwand l'ôte tchule… [Le malheur des uns fait le bonheur des autres].