Volà cinquante-sèpt an sonné
Qui nos viquans pâhule è nosse pitite Bèlgique ;
Çou qu’ l’an trinte nos a-st-aminé
C’è-st-èco l’ mèyeu dès république.
Mais volà qu’ dès Flamind,
Po leus pârlumint,
Volèt fer lès cagnièsse,
Rouviant qu’ lès Wallon
Ont fondé l’ nâtion
Bin pus qu’ lès qwârèyes tièsse.
Ine Anvèrsois a brait bin haut
Qu’i cang’reu, s’èl falléve, si pènne conte ine èpèye.
On pau d’vant, di nosse vîx drapeau
Ine aute dihéve : Ji n’ f’reu qu’ine bèchèye.
I nos a traitî,
Divant tot l’ pays,
Di mâvas pâtriote.
Qu’on l’s i clôse leus geaîve,
Elles ni sont nin saîve
Tote cès tièsse di houlotte.
Rouvèye-t-on qu’à l’ révolution
On voléve tot comme hoûye, sâf curé èt chènône,
Fer pârler à tote li nâtion
Li bai lingage dès kanifichtône.
Rivingîz l’ Wallon,
Mayeûr d’Andrimont,
Qui Lîge di vos seûye fîre,
Qui nosse vèye Cité
Wâde li liberté
Dè jâser à s’ manîre.
Mais c’è-st-assez fer lès qwanse di nos hére,
Flamind, Wallon, louquans d’èsse pus sûti,
Et, tot r’léhant lès pâge di noste histoire,
Apprèpans nos èt n’ tûsant qu’à fièstî ;
À nos èfant nos n’irans nin fer creure
Qui nos avans qwèrou à nos qwitter.
Tixhon, Wallon, i n’ nos fâ nin mèskeure
Ine heûre di pâye, on moumint d’ liberté.
Ouve eplaideye sins tite. El tite diné cial, c’ est l’ ci k’ on trouve e l’ Dictionnaire bio-biographique des Littérateurs d’expression wallonne, p. 95, da Paul Coppe et Léon Pirsoul. On trouve co bén l’ tite e francès Poème sur les Flamingants, metans dins l’ Table générale systématique des publications de la Société, 1908, p. 118, da Oscar Colson. On-z a ptchî d’ prinde el tite e walon.