Si r’lèver/I
I
Tos lès djoûs, su l’ côp d’ chîj-eûres, dji zoupèle foû di m’ bèdréye, franc-batant come on diâle, èt dji n’a nin dandjî d’on rèvèy.
Faut dîre qu’i-gn-a d’dja one fameûse pèkéye di r’lèvé d’vant mi. D’abôrd li coq qu’a tchanté tot timpe aviè cinq eûres èt lès p’tits mouchons qu’ont todi l’ pîce po mète au trau. On dît todi qu’on-z-è-st-abitouwé. Mi, dji choûte. C’èst nosse pa, qui d’chind lès montéyes su sès tchaussètes po sayi di n’ nin nos dispièrter. Nosse man sût, tot coût, i vont sognî lès bièsses, djèter, mode : li djoûrnéye s’èdaume, come ayîr, come dimwin...
Il arive co bén qu’i s’ forpassenuche : quén trayin dins lès bièsses ! Lès pourcias qui winkèlenut après leû laton, Bèla èt Jinète, nos deûs tch’faus qui pîtèlemut èvou leûs chabots dins leûs stales, lès vatches qui beûlenut po-z-èsse modoûwes èt Diane nosse tchén d’ coû qui bawe come po dîre : « Èt qwè, vos-ôtes ? Avoz rovî qu’ n’èstant là ? »…
Dji sé bin qu’ dj’ènn’a co po one eûre divant d’ m’aprèster po li scole, djusqu’à sèt-eûres, quand l’ grosse cloke di l’èglise boumerè lès trwès prumîs côps dès pârdons.
Po ç’-t-eûre là, tote li maujone sèrè d’ssu pîds. Dj’arè faît r’lèver mi p’tit frére Silvin, sèt-ans pus djon.ne qui mi, l’awè lavé, l’awè moussî, li awè aprèsté sès tâyes di pwin, lès mète dins s’ carnassiére, djurer d’ssus, - siya, ça m’arive co bin – po li bin fé comprinde qu’i dwèt mougnî tote li casseroléye èvou lès deûs-oûs qui dj’ vins d’ li cûre…
Armand, nosse pus vî frére, dî-sèt-ans, irè bèsognî paujêremint èvou nosse pa. Michèl, quausu m’ djèrmale, pus djon.ne qui mi d’ dîj-ût mwès, mins qu’è-st-ossi fwârt, Silvin èt mi, tos lès trwès, nos-alans à scole à Djodogne au bus’ !
Nosse man a rabroké, nos v’là d’vant lèye, trwès-agnons à l’ filéye.
« Jaki, t’as co do djane d’oûs su t’ minton ! »
« Michèl, t’as co mau bot’né ti tch’mîje ! »
« Silvin, mi p’tit keûr, done mi on bètch ! »...
Rademint on côp d’ouy pas l’ fignèsse, dau lon on veût li djane bus’ qui nos min.ne à scole. I monte dè l’vôye qui vint dè l’Brouwêre.
Dins cinq minutes, i sèrè là…
« Èt waîtiz d’ bin chouter à ç’ qui l’ maîsse vos dirè !… »
Nosse man, èle voureût bin qu’ dji m’ freû küré, c’èst po ça qu’èle nos-a mètu à scole dilé lès p’tits fréres. Dji sondje à ça, tot wèspiyant mès fréres po qui rotenuche one miète pus râde. Ci samin.ne ci, c’est cor on wargnasse di tchaufeû. I nos-a d’dja sèré s’-t-uch pa d’vant nosse néz d’ pus d’on côp. Èt dji n’ voureû nin co yèsse payî èvou dès pâtêrs di tchén.
C’èst qu’ djè l’ veû voltî, nosse man. I-gn-aureût nin c’-t-idéye là dins s’ tièsse, dji wadje qu’on s’ètindreût bin. Quand dji r’pinse, i m’ chone qui dj’a branmint da lèye. Èlle èst bèle, èle boute sins r’nicter, èle sét cujener come on grand chèf, èle sét rîre. Mins èle monte rade à lacia si vos-aloz conte sès-idéyes, èt tièstoûwe come one bique quand i-gn-a pus rin qui va ! Quéquefîye bin qu’ dji d’vaîrè come lèye pus taurd. Dins tos lès cas, dji n’ mi veû nin bouter à mwârt come nosse pas.
I faut vraîmint yèsse djondu d’ l’aurzîye po co fé l’ mèstî d’ cinsî. C’èst todi timpe èt taurd po dès broquètes di viole. Èt portant, c’è-st-on si bia mèstî. Mins dji n’ m’è sin nin capâbe.
Nos v’là d’vant li scole. Dj’î a faît moussî mès fréres. Jële, Bouboune èt Fil, mi ratindenut d’vant l’ grande pwâte, i n’ manque nin on djoû, po qu’on tape one pitite divise tos lès quates divant d’ataquer l’ djoûrnéye…