A Rindeu, dj’ avans avou l’ tchance d’ aveur Jean-Philippe Legrand, k’ est on grand waloneu, li ptit-fi da Camille Gaspard, k’ a bén vlou vni prezinter les efants. Et fé çk’ i faleut po k’ el shijhe fouxhe ene bele reyussite.
Et a ç’ moumint la, dj’ a avou l’ tchance, avou, di fé vni èn ome ki fwait ça foirt bén (li sonorizåcion) - c’ est André Laurent, di Tcherin – k’ a fwait ça avou des micros-crawates. Et on oyeut foirt bén les efants. Divant, avou l’ seu micro, ça n’ aléve nén ; on n’ oyeut nén bén.
Et a ç’ moumint la, les « mamjheles Lingaedje »[1] ont vnou, avou, po djustuint sey dins l’ djuri – avou l’ mayeur d’ Oufalijhe, dayeur, Lutdjen. Don, totes sôres di djins k’ estént la po fé l’ fiesse avou nozôtes, et po les efants, e walon, po fé valeur li walon.
Après ça, dj’ avans stou a Manhé, al Vå[2]. Et la, c’ esteut vormint ene bele pîce avou todi Jean-Philippe Legrand, mins sortot k’ esteut la mins pol prezintåcion, Djustine, k’ aveut stî Mamjhele lingaedje l’ anêye di dvant, ki, leye, a foirt bén prezinté – dins s’ walon do costé di Ståvleu, c’ est on pô diferin, mins tolmonde li compurdeut foirt bén, c’ esteut plaijhant -et (…) Miriam Crismer, leye, ene kimere k’ a tchanté e walon – et k’ a minme sitou a Lidje, dayeur å concours del tchanson walone. Et ça a stou ene foirt bele reyussite, avou. (…) Dj’ avans tchanté « Vive nosse Walonreye », li tchant da Camille Gaspard. Et tolmonde tchantéve avou nozôtes. C’ esteut vormint ene biele fiesse, hin, avou a pô près 80 efants k’ estént la.
L’ anêye d’ après, dj’ avans stou a Hebronvå. A Hebronvå, la, c’ esteut Pablo k’ a vnou. C’ est èn Ourougwayin, èn ome ki djåze l’ espagnol, mins ki sotént l’ walon li pus possibe, ki ndè fwait l’ macsimom pol walon. Et c’ est lu k’ a prezinté l’ shijhe. Avou l’ prezince – et li prezintaedje – d’ ôtès djins : c’ esteut li mayeur del Viye Såm, et l’ mayeur di Bomgni, André Hubert. Et il ont djåzé walon. Il ont dit k’ c’ esteut foirt bén, çou k’ dji fjhéns la. Ki dji dvéns porshure, bén seur, k’ i nos soténréns di totes les manires possibes.
Epwis, dj’ avans stou a Bastogne. Paski Ane Dilene, k’ end aveut yeu djåzer, a dit « ça n’ sereut nén må ci vos frîz ça avår ci ; ça sreut ene boune afwaire po nozôtes. »
Pî-notes