Dimandeu : Mins vos av fwait ossu des bates po les efants dire des cazaedjes e walon?
André Lamborelle : Bén, ça egzistéve dedja dvant, hin. Paski, avou l’ abé Mouzon, et speciålmint avou èn ome… Jean-Claude Rigaux, ça egzistéve dedja. Ça rotéve bén. Les troes pårteyes del province (do Lussimbork)… Neni, paski do Dzeu[1], i nd aveut pont ; di nosse costé, ça n’ si fjheut nén. C’ est l’ veur. Ça s’ fijheut do costé del Gåme et å Mitan, hin. C’ est Jean-Claude Rigaux ki, a ç’ moumint la, fjheut l’ animåcion. Et pu, dj’ end a djåzé avou zels : avou Jean-Claude Rigaux, avou les cis di ç’ costé la. Il ont trové k’ ça sreut foirt bén. Et l’ abé Mouzon esteut contin, avou, d’ el fé d’ nosse costé. Dayeur, i djheut, l’ abé Mouzon : « Pocwè k’ ça n’ si fwait nén di ç’ costé la, paski dji sai k’ i gn a bråmint des djins ki djåzèt l’ walon, k’ i gn a do teyåte walon, et bråmint des afwaires ki s’ fijhèt pol walon. » Et i n’ veyeut nén pocwè k’ ça n’ si fjheut nén. »
Et dj’ a avou a ç’ moumint la l’ idêye d’ el fé, d’ el lancî, avou, di l’ enonder. Dabôrd, e pårticipant a çou ki Jean-Claude Rigaux fijheut, dins les concours di recitåcion ki s’ ont fwait dins s’ viyaedje, on certin moumint ; k’ on a fwait, avou, dins totes sôres d’ ôtès plaeces, di ç’ costé la… a Rozire, avou, on moumint dné.
Epwis, di nosse costé,… on a rmonté ; dji les a fwait vni a Oufalijhe. Et a ç’ moumint la, gn aveut co todi troes pårteyes : gn aveut li Dzo[2], li Mitan, hin, li Cinte[3], et nozôtes li Dzeu.[4]
Et on purdeut, alôrse, pol finåle, les meyeus, po fé ene fiesse a Libråmont avou Jean-Claude Rigaux, po tertos. Tos les meyeus, todi, k’ avént stou ritnous.
Et après çoula, ns avans stou a Rindeu. Mins come dji veyeu, mi … - et a Håre avou… dabôrd a Håre – ki on oyeut målåjheymint les efants, avou on simpe picro, come ça, so pî, assez lon d’ zels, dji m’ a di k’ i faleut trover ene solucion, cwè ; k’ i faleut absolumint sayî di mete des ptits micros, des ptits micros-crawates et tot ça po k’ on les oye bén. Ôtrumint, c’ esteut målureus. Les djins n’ estént nén contins.
-
Jean-Claude Rigaux, enondeu des bates avou Raymond Mouzon -
a Håre, e 2003, la k' les micros n' alént nén bén -
item est i, avou André Lamborele, come prezinteu
Pî-notes