Quand tès dèmonéyès-idéyes
Rivenîn’ kèkyî t ’ vinte,
I m’ monteûve one moyale fîve ;
Dji t’âreu vôyî au diâle !
Audjoûrdu,
Dji n’a rastinu
Qui l’ bèle pormin.nâde
Di nosse vikairîye,
Bèle,
Come l’imaudje di l’Avièrje
Qu’ on va priyî
D’vant d’ s’èdwârmu.
Dji n’ veû nin voltî lès-èglîjes,
Ni lès-Anjélus’ di prandjêre,
Ni lès tchants qui tchaîyenut dau docsau,
Vos m’ doneroz vosse pârdon.
D’èwou soûrd-èle,
Ci vîye peû là,
Qui m’ rimonte,
Qui m’ tint lon èri dès-èglîjes,
Ci vîye peû là,
Qu’on r’ssint vélà
Èwou qui l’ mwins’ pitit brût,
Vos tchaît su l’ dos come on vî r’vâzî.
Portant, èt avou ça,
Dji m’asgligne padvant l’ fwâce
Qu’ il a falu po lès bâti,
Dji m’asgligne
Divant cès djins là què l’s-ont satchî
Foû d’ leûs mwins.
Dji pèpîye d’ausse
Divant cès djins là
Qui vègnenut vélà
Po s’ rapaujî,
Po s’ rècoradjî.
Qu’ a dj’ è l’ capotine,
Po n’ nin crwêre à tot ça ?
Quand dji m’èdwâme au gnut,
Pa d’zo lès stwèles,
Dji m’ distchausse di mès peûs
Su l’ soû. Mièrnu,
Dji ratind qui m’ somây
Rèface mès disbautchances
Lèdjêr’ come on plomion,
Rinètî di totes mès frawes,
Dj’asplâne tot li stwèlî,
Po r’trover one mitan qui dj’ n’a pus.
Èst ç’ li song d’on Bon Diu
Qui cour’rè dins sès vwin.nes ?
Portchèssadje
Portchèssadje
Portchessadje