On bea dimegne di may, li djinteye Nanete,
tot rivnant d’ grand-messe, passa po l’ grand pré.
Cwand ele vina dvant l’ håjhea da Colete,
ele trova s’ vijhén riyant d’ l’ ôte costé.
« C’ est seré », dit-st i, « ci n’ est nén passaedje ;
mins si vos voloz, dji vs tirrè l’ loket.
So vos belès tchifes, leyîz m’ prinde on betch,
nos estans tos seus, nouk ni nos voerè !
» Po passer l’ håjhea, binamêye Nanete,
i fåt k’ vos payîxhe li droet do pazea :
i fåt k’ vos m’ båjhîxhe deus feyes a picete,
po passer l’ håjhea ». (bis)
Lu djonne feye divna rodje come on cressôte
(si vijhén Colete esteut bea valet).
« Vos dmandez », dit-st ele, « pus a mi k’ ås ôtes :
ci n’ est nén ç’ pris la k’ mes vijhenes payèt.
— C’ est k’ les fleurs », dit-st i, « di m’ waide sont floreyes :
ele seront djalotes di vey vosse beaté,
et dj’ wadjreu po dmwin k’ ele seront fanêyes
a cåze di les låmes k’ elle åront djeté !
» Po passer l’ håjhea, binamêye Nanete,
i fåt k’ vos payîxhe lu droet do pazea :
i fåt k’ vos m’ båjhîxhe deus feyes a picete,
po passer l’ håjhea ». (bis)
Li djonne ome pårléve d’ ene si doûce manire,
divins ses bleus ouys, il aveut tant d’ amour
ki l’ roslante Nanete si leyant adire
abressa l’ capon deus feyes di bon cour !
A ci moumint la, divins les coxhetes,
tos les ptits oujheas tchantît djoyeuzmint,
et Nanete veya rire les magriyetes,
cwand Colete lyi djha, tot l’ serant doûçmint :
« Rivnoz tos les djoûs, binamêye Nanete,
nos shurans eshonne li froté pazea ;
et nos nos båjhrans deus feyes a picete,
po passer l’ håjhea ». (bis)
Dj’ a-st etindou dire des djins do viyaedje
ki l’ djoû ki l’ djonne cope ala-st a l’ åté,
tote li ribambele k’ esteut å mariaedje
divant l’ blanc håjhea duvît s’ arester.
E fond do noer bwès, l’ råskignoû tchantéve,
les fleurs si drovît dzo l’ båjhe do prétins ;
et c’ esteut Nanete, ci djoû la, ki djhéve :
« On n’ va nén pus lon sins m’ diner l’ paymint !
» Po passer l’ håjhea », djhéve li bele Nanete,
« i fåt k’ tot l’ monde paye li droet do pazea :
i fåt k’ vos m’ båjhîxhe deus feyes à picete,
po passer l’ håjhea ». (bis)
Po passer l’ håjhea
Ciste ouve ci egzistêye eto divins ds ôtès ortografeyes : Feller.Po passer l’ håjhea
Rortografiaedje e rfondou di Po passer l’haûhè, pa Pablo Sarachaga, 2019