Po nosse Pa
On sofèle
One prumêre tchandèle
Po l’ prumî gnognot.
On clatche dins sès mwins
On bistoke à plins dints
Lès balons pètenut.
Lès-èfant rîyenut,
Courenut dins l’ djârdin
On fièstéye li maus’…
Èt vos,
Qui dit todi tot,
Vos d’mèrez moya
Su vos maus,
Pace qui vos savoz :
L’èsté sèrè vosse dêrin.
On cwârbau d’ misére
A stindu sès nwêrès-éles
Divant vosse solia.
Li rodje song qui coûrt dins vos vwin.nes,
N’èst pus qu’one lavasse
Qui min.ne vos ptitès-ascauchîyes
À ravau.
Vos n’avoz pupont d’ bon timps po sondjî,
Nune iviêr à solia,
Rin qu’on cwârp qu’ènn’èva,
Al doûce,
Su s’ pwèd,
Tot doûcètemint,
Trop doûcètemint.
Èsteût ç’ bin vos,
Li pa qui m’ fieûve choûter,
Li pa qui m’ fieûve djurer ?
Èsteût ç bin vos,
Li pa qui vèyeûve si voltî nosse man,
Djinti au-d’là ?
Por vos dj’a r’trové lès djèsses,
Qu’on prustéye aus-èfants.
Chaque djoû rèface one rôye.
Vos qui t’neûve tièsse à tot,
Vos n’avoz pus qu’on vî baston
Po vos mostrer l’ vôye.
Lune àprès lune,
Vos vos disfurloquetoz dins l’ vint.
À ç’ compte là,
Vos n’avoz pus l’ timps
Do taper vos-eûres
Aus-éles dès molins.
Avoz ètindu l’ûlau,
Qui drove si vôye,
Po v’nu adlé vos ?
Dji m’ faî do mau
À churer.
Dji vôreû bwârler
Po nè l’ nin ètinde.
Combin d’aléyes à couru.
Combin d’ tchambes
Di rascrauwes
Po vos spales.
Nos-èstans èchone
Tos lès deûs.
Mès paumes tote frwèdes
Rapaujîyenut vosse tièsse.
Dji lî tot ç’ qui v’ savoz
Dins vos-ouys tot disflanis.
Quî èst ç’ qui wasereût co
Tinkyî su lès cwades
Do pauve gugusse
Qui v’ savoz qui v’s-èstoz div’nu.