Et m’è v’là co padrî l’fènièsse
Sins djoke èt mourmachant dins m’tièsse
Dji m’èrwè co èstant èfant :
Lès djins èm’ trouvît d’djà soyant.
El timps a passè pa-d’vant mès-îs
El moncha d’eûres s’a dispiyî
Avou sès p’titès maladîyes,
Sès trèyîns, bisbroûyes èt chîe’rîyes.
Qwè fé rocî padrî l’fènièsse ?
Toute èl djoûrnéye, dji r’wéte dins m’tièsse
Eyèt c’è-st-in moncha d’souv’nances
M’fèyant crwêre qui dj’n-é pont yeû d’tchance,
Qui s’disroulît come in tchap’lèt
Lèyant pinser qu’c’èsteut l’mwés chwès
A chaque côps qu’i gn-aveut n’décisîyon
Dj’è l’pèrdeu sins wêre di passîyon.
Gn-a p’tête pont d’barau à l’fènièsse
Mins i gn-a pont n’èrén dins m’tièsse,
Pace qui lès-idéyes èrpass’nut
Et lès-imâdjes ès’ coumèl’nut
Sins qu’dj’arîve au grand jamés
A tènawète lès rachoner
Et pouqwè nén lès r’mète d’alûre
Pour mi m’sinte binauje dins mès meûrs.
Mins dj’èrwéte toudis pa l’fènièsse
F’yant sins djoke èl grimace dins m’tièsse.
A tous momints, d’seû mau dins m’pia
Soufru, avou mès vîs-ochas.
Yeûsses sont toudis prèsse à skèter
En ratindant d’yèsse ètèrè.
Dandjreûs qu’is vont s’plére mon lès vièrs
Pace qu’is wèy’nut voltî èl nwêr.
C’èst come mi avou mès-idéyes.
Em’ vîye a toudis stî fayéye
Quand dji tape èn-ouy’ pa l’fènièsse,
Lès djins satch’nut ène drole di tièsse
Pace qu’asteûre, mi, dji n’fé pus rén
Dji m’rakinkîye ratindant l’fén.
Probâbe qui ça s’ra pou bénrâde :
Dalant pou m’dérène pourmwin.nâde,
Dji m’dîré qui dji n’pou pus rén.
Passâdje di nuwéyes, n’va pus scapé
In côp pou d’bon, dji toûn’ré l’tièsse
N’wét’ré pus jamés … pa l’fènièsse !
Oyåve å schoûter l' sitroete plake « Padrî l' finiesse ».