Cisse pådje ci a stî coridjeye ey est l’ minme ki l’ sicanaedje.
— 72 —
DADITE
Çou ki dj’ sai, c’ est k’ Emile est pus sûti k’ çoulà… Vos alez torade croere çou k’ Tonton raconte, vos ossu ; ni veyoz vs nén bén, enocin, k’ ele dit çoula pask’ ele vôreut bén k’ c’ estaxhe vraiye ! Elle est pus ruzêye ki vos.
POREA
Ô ! i s’ pôreut bén, dji n’ vou nén dire…
DADITE
(alant viè l’ coujhene)
Si c’ n’ esteut nén k’ on åreut sogne do mete e l’ tiesse di nost Emile çou k’ i n’ a nén, dji lyi racontreu ; dji wadje k’ i reye come on bossou.
POREA (a pårt)
Mi dji n’ pinse nén. (a Dadite) Alez vs apontyî l’ dinner ?
DADITE
Awè edon, il est grand tins.
(ele sôrt a gåtche)
SINNE XV
POREA
(si dressant et alant viè l’ coujhene)
Savoz vs bén Dadite ki l’ colon da Gårnir est rivnou prumî ! Il est dvins ene djoye ! (i ridschind) Tot l’ minme, çou ki vént foû d’ bon est sovint bon ! On-z a råjhon del dire.
(Emile rintere pa l’ fond)
