Pådje:Théophile Bovy - Li grandiveuse, 1899.djvu/rif/43

Èn årtike di Wikisource.
Cisse pådje ci a stî coridjeye ey est l’ minme ki l’ sicanaedje.
— 43 —

DADITE

Ô ! c’ est on concert di bénfjhance, on-z etindrè des tchanteus et des tchanteuses ; et des hupés savoz, end a minme då grand teyåte ! Et pwis après, i gn a bal !

EMILE

C’ est l’ afwaire, et si vos avoz-st idêye do fé vos troes pas avou m’ popa, i n’ ténrè k’ a vozôtes !

DADITE

Awè ! Todi seur ! C’ est vosse mame ki va s’ mete a danser ! (avou mistere) Mins ci n’ est nén tot çoula dê m’ fi, i gn a ôte tchoi !

EMILE

Oho ! et di cwè don mame ?

DADITE

Vos n’ comprindoz rén surmint ; dji so bén pus fene ki vos savoz mi !

EMILE (flateu)

Vos l’ avoz todi stou dê mame, pus fene ki mi !

DADITE

A ! mins les femes ! Et les meres sortot !

EMILE

Et bén ki voloz vs dire ?

DADITE

Tot bounmint çou-cial, ki madame Fordjeu ni m’ a nén egadjî a-z aler amon Ruth ouy al nute, po-z aveur li plaijhi di m’ vey. Ele mi voet voltî savoz, djel sai bén, mins ci n’ est nén po çoula tot seu…