Avoz vs cåzu fini do pretchî !
Ô ! dji sai bén k’ dji n’ wangnrè rin. C’ est tot côp d’ såbe e l’ aiwe. Li pleu est pris, c’ est di m’ fåte, et l’ åbe må tourné est trop vî po måy si rdressî.
Est ç’ li bea Gårnir ki vs a consyî di m’ fé ene sinne insi ? Cwand i vénrè co cial, dji lyi mosterrè l’ ouxh, ci-la ! (aporçuvant ki Porea n’ overe pus) Kimint don, el leyîz vs ouve ? Avoz vs fini vos escôsswesses ?
Awè dj’ a fini ; n’ est i nén tins, po on semdi al nute ?
Et bén, i n’ a nou må, dji va poleur on pô rnetyî. Avou les omes avå l’ måjhone on n’ pout rén fé d’ bon. (loucant al tere) Loukîz l’ bea Gårnir k’ a vnou taper les cindes di s’ pupe tot costé.
Dji m’ va ene gote rinetyî, savoz.
Awè, alez.
A dj’ dju on prôpe sårot ?
Awè. E l’ årmå sol deujhinme plantche. Dji vén del ristinde.
