La vèye (1)
1. Èlle è scrotè nos vèrts pachis ; Èlle è hapè nos p'tits cortis ; Èlle è rawiè lès bwès d' fawèle ; Èlle è gordjè dins lès viréyes. Èlle è spiyè nos vîes cassines Po-z-î bauti dès hôtes garines. Lu p'tit bî è stî ratèrè ; Èlle î r'naude sès flates, sès nichtès.
La grande vèye gangne, Come ène meûte du leûps crèvant d' fwim Qui n' lèyèt rin t't-au long d' leû tch'min. La grande vèye gangne.
La grande vèye créche Après lauvau, après là-hôt, Avu s' cimant, avu s' bèton, La grande vèye créche.
2. Lès cinsîs sont duv'nus ovrîs ; Gn'è pupont d' galotches à leûs pîds ; 'l ont tapè djus leû camisole Po fé lès cis qu'ont stî à scole. Lès sous î sont vitemint gangnès; À fwêt gangnès, à fwêt k'chèrès… Èt si l' vicadje èst trop coustant, On gueûye dussu l' gouvèrnemant.
La vèye cumande. On è peûr du sès milions d' djins ; C'èst zês qui f'jèt l' plave èt l' bon timps. La vèye cumande.
La vèye su r'drèsse. Su peûpe runake so sès tayons Po sîre la «civilisâcion». La vèye su r'crèsse
149
