Kî çk’ a stî vir tot çk’ on raconte ?
C’ est po vos liårds ki font leu contes !
Leyîz vo fôrtune å curé :
N’ a pupont d’ diale ! vo stoz schapé.
El Vî grison inte ses deus mwaistresses.
Po on vî ome, c’ est come on spot :
On dit todi : Pus vî, pus sot !
Cwand on pinse a ça, gn a d’ cwè braire !!
On vî grison, poeve et sé, tot cassé,
D’ viker djonne ome nd aveut assez !
Il esteut tins por lu d’ cachî après ’ne comere,
C’ est målåjhey cwand on dvént vî !
Mins il aveut des clås ! — c’ est ddja bråmint po plaire,
Cwand on-z est bén dins ses papîs !
Avou ça l’ laid dvént bea, l’ vî dvént djonne, eyet l’ biesse
Passe po-z awè del tiesse,
I coreut les dicåces ! al fén foice di cachî,
Deus veves vlént lyi taper dins l’ ouy :
Ene, grijhe ! so l’ ertour d’ ådje, åreut vlou l’ emantchî,
L’ ôte djonne, nén co trop må, eyet noere come del houye[1],
Vla ki s’ adaye a fé l’ amour !
Ashid inte yeusses deus, on l’ ertoutche, on l’ erletche,
Ele såclént ès broushe tchaeke a toû ;
El viye saetchive les noeres pa metche !
Po ki fouxhe coleur di s’ fås toû !
Et l’ djonne ploukive les gris, sol tins ki s’ fijhént l’ cour !
Ele lyi ont si bén ploumé s’ tignasse,
K’ des tchveas, i ndè dmoréve ki l’ plaece !
- ↑ houye purade ki hoye po wårder l’ rimaedje
