I våt co mieus mougnî ’ne crosse,
A s’-n åjhe, dins l’ gurnî, dzo l’ toet,
K’ vea, poye, tåte, boubounes al loce,
Dins ’ne såle, roede, biesse, et djinné.
El Leu eyet l’ Agnea
Cwand on-z a ’ne solide pougne, et k’ on s’ sieve bén del lûte,
On-z a sovint råjhon ! Nos l’ mosterrans tot d’ shûte :
On djonne bedot, dlé ’ne gregne, sins s’ ertourner beacôp,
Boeveut dins l’ fossé l’ long del cinse ;
On leu ki creveut d’ fwin, l’ waitive sins piede pacyince,
E cachant on moyén, po bén emantchî s’ côp :
« Kî çki t’ dit d’ rischurer tes mannets pîs dins m’ boere ?
Dit-st i l’ Leu, e mostrant s' machwere !
« T’ årès ’ne rôlêye, t’ es bén trop franc !
— Monsieu, dit-st i l’ agnea, i fåt esse bon efant,
« I n’ vos fåt nén esse mwais si rade,
« Fjhoz atincion m’ tchir camaerade,
« K’ dji n’ pou rén vos fé puski dj’ boe,
« Dins no fossé,
« Copu d’ vint pîs erî d’ vos brokes,
« Insi dji n’ pou nén disrindjî,
« Vo boere ni vo mindjî !
— Ti l’ disrindje, dit-st i l’ Leu, ki vleut lyi fote ès croke !
« Gn a èn an t’ as stî dire do må d’ mi tot costé !
— Ça n’ si pout nén ! Dj’ n’ esteut nén co velé,
