J’ voreu portant n’nin v’ mette â coron d’ voss patiince,
J’a n’escuse et volchal : c’est m’ prumire confèrince.
On comprind, on sé tot, qu’ n’a-t-on nin inventé ?
L’ gènie di l’homme, s’a fait rissinti d’ tot costé ;
Ci n’est don nin brâhler qwand c’est qu’on vint nos dire
Qui noss siéke est bin l’ siéke di progrès et d’ loumire.
Louquiz tot âtou d’ vos, ci n’est qu’ des invenchons,
Des lavasse di d’ coviette toumant st’à profugeon ;
Mais, assez d’èclameur, arrivans âx eximpe.
Vlà cinquante ans, v’ lèvant, on s’ lèvéve alôrss timpe,
Voss prumîre des bèsogne esteut dè fer dè feu.
Ni polant mî, vos d’vîz dèjà v’ dire aoureux
Di v’ poleure ahessî avou n’espéce di coffe
Qui poirtéve, si j’ tins bin, li no d’ lâze à l’ sitoffe.
Vos battîz reud l’ briquet pos esprinde l’amadou,
Ji vou dire li boleu, puis vos v’ chouquîz l’âme fou
De coirp, à tot sofflant pos aloumer l’ brocale,
Qui sovint s’ distindéve divins vos mains ; li diale
S’en n’è meléve, portant vos dvîz bin ricmincî
Li bèsogne qui d’on côp v’ n’avîz nin agercî.
Par mâlheur, li brocale, qu’esteut èpufkinaie,
En s’distindant vis féve avaler ine hinnaie
A fer stierni on chvâ, on bouf, ine élèphant.
Houie, fer feu, fer loumire, c’ n’est pus qu’on jeu d’èfant.
Vos v’ lèvez, i fait spet, i fait nute, on n’ veut gotte,
Vite on prind n’aloumette et tot s’hâstant on l’ frotte
So l’ meur ou so l’ planchi, ou so tot çou qu’on vout,
Et crac, l’aloumette broule, à voss volté, v’ fez l’ joû.
