D’à l’ prîhon jusqu’â Pont d’Amécoûr, on n’ mette nin pus d’on p’tit qwârt d’heûre ; cisse vôïe esteut treus feies pus longue, qwand on d’véve sûre li quai d’Mâstréck, li Batte, li R’bouwaie et passer d’zos l’ârvô dè Pont-d’-z’Aches.
Totes les mahèïès aiw’s comme li Barbou, li Riv’lette, etc., qu’on veyéve caracoler avâ l’ qwârtî, sont r’jettaies è l’ Moûse ou coret d’zos térre divins des grands canâls à voûsseure et cèx-cial siervet à èherchît bin lon les mâssîstés des sèkrétes di chaque mohone, ca, po l’ nettisté, à l’ veie di Lîge rivint l’ pompon.
So l’ plèce Grètry et l’ pont Saint Nicoleie, on fat li balwér di l’Est et d’zeû l’ Barbou, li ci dè l’Constitution ; ces deux porminâdes avou leu bellès dréves, sont câzî les pus joleies qui nos âyanse, et ci n’est nin pau dire !
Li Pass’relle, batteie en 1880, inte les Ponts d’-z’Aches et dè l’ Bovreie, dreute âddivant dè l’ rowe dè l’ Régince, est d’in’ assez bai côp d’oûïe avou si d’vanteure à balusse et s’ dobe montaie di dîhe-hût grés d’ chaque costé ; mais elle a st’assèchî pus d’atotes qu’elle ni vâïe so l’ narenne dè ci qu’enn’è d’na l’îdeie ; et portant i fât esse jusse, tote dipréheie qu'elle a stu, elle rind des grands siervices tot r’loyant li mitant dè l’ veie â coûr di Jus-d’là-Moûse.
Comme elle est ossu âddivant dè Sâci, cicial div’na on p’tit balwér qu'est sinsémint li k’minç’mint des deux autes ; c’est là qu’on z’admeure li bai monumint
