Pådje:Œuvres de M. l’abbé Louis-Joseph Courtois, 1972 (in Les Cahiers Wallons, num. 4).djvu/2

Më Vî Walon

On comprind ça qu’on flamind n’ sinte në waîte
On frére walon,
Qu’ë l’ veûye èvi, èt dins s’ cœûr qu’ë l’ sowaîte
Au diâle bén lon.
Flaminds, walons, c’èst dès-èfants d’ deûs méres
Dëspeûy todë :
On vëke èchone, dins lès min.mès miséres
C’è-st-on plaîjë !

Mins cë quë r’toûne më cœûr èt mès-ëdéyes
C’èst quand dj’ètind
L’ flamind causant come aus djon.nès-anéyes
Come sès parints,
Lë vî lingadje qu’ârot s’ song, qu’ârot s’ vîye
— Lë chér djaurgon —
Èt qu’à costé, pës d’on walon rovîye
Së vî walon !

Rovî s’ walon ! Ç’ n’èst nén ça qu’ë faut dîre
Po l’ambëcieûs,
L’ walon èst pôve, trop fayé, bas, co pîre :
A ièsse ontieûs !
L’ambëcion vëke dès grands-aîrs qu’èle së done :
On cause français
Come lë mèskène qu’è-st-èrî dë s’ maujone
Dëspeûy chîs mwès !

Rovî s’ walon ! Ostant r’niyî s’ provenance
Èt sès parints !
C’èst lèyî là s’ clotchî, l’ twèt dë s’-t-èfance
Quétch’fîye di strin…
Quand c’èst qu’on-ûse sès fèsses sër one tchèyêre
A doze cints francs,
Vos p’loz bén sinte qu’ë s’ faut one mëne pës fiére
Èt s’ ténre dë s’ rang !

Dj’a rèscontré mwints côps dès grands profêtes
M’ waîtant dë d’zeûs
Èt m’ fiant dès-ouy au trëviès d’ leûs lënètes
A-z-oyë peû ;
Ës d’mandîne compte dë m’ walon, dë s’-t-alûre
Èt, s’ moquant d’ nos
« Vos n’avoz pont, d’djîne-t-i, d’ litèrature !
Comint scrîjoz ? »