Ën-a tant quë m’ont dët d’ lès scrîre
Èt qu’ m’ont faît l’ plaîjë d’ lès choûter :
Combén d’ côps m’ lès-a-t-on faît r’lîre
Èt min.me pës d’on côp lès tchanter
Qu’âros-dj’ faît, djë m’ lèyeûve à dîre ;
Quand èst-ç’ qu’on sèrè continté ?
Audjourdë c’èst l’ovradje intîr
Qu’on r’clame… dès maîssès volontés
L’ mouchon n’èst nén faît po l’ gayole
S’ël a dès-éles ë faut qu’ë vole
Ainsi l’a-t-on todë comprës…
Qu’on lès-admète… qu’on lès spèpîye
Dj’ faîs prinde l’aîr à mès Ravauderîyes.
Trop rèssèré, ça sint l’ mûtrë !
Fleûr së ténre èt së dèlicate
Lèyîz l’èfant, èfant qu’ël èst
On l’ dëstrûrè todë trop rade
Lèyîz l’èfant come Dieû l’a faît
Ël èst së bia, fiant sès grands-ouy
D’ssër on mëstère èbarassant
Ël èst së doûs quand ë s’aspouye
D’ssës l’ cô dë s’ mére en l’ rabrèssant !
Në d’mandez nén ç’ qu’ë pôrè ièsse
Contintez-vos dë s’ prëmî pas.
Në vèyoz nén l’ pére qu’è-st-à l’ fièsse ?
Ë lî chone qu’ë vént d’ dîre « papa » ?
Dë vos-èfants r’fachîz lès-âmes
Vos-avoz si peû d’ leû p’ tët cwârps ;
Èt c’èst l’ bon Dieû quë vos lë r’clame
D’vant lë, par zèls, n’eûchîz nén twârt.
