Noveles et binde ås desséns/XXVII
Ciste ouve ci egzistêye eto divins ds ôtès ortografeyes : Feller (rifondant namurwès).
XXXI
Li vî galant da Cristele
Vola ! li dierinne floreye esteut modowe. Il aveut rmetou les saeyeas su l’ passaedje inte les cous des vatches. Les tchèts avént acorou letchî l’ schome so li dzeu.
Oli ni s’ a seu rastini : il les a fwait rescouler. Il a apicî on saeyea des deus mwins, l’ lever padzeu s’ tiesse et boere li tchôd modou lacea a plinne golêye.
Il a rxhorbou ses lepes. Li cene di dzeu esteut co maxhurêye di blanc.
Kristele a abroké, rouf-rouf. Ele li razouyive, des stoeles di djeriaedjes bôguént ses ouys.
Ele s’ a vnou aclapé a lu, si visaedje presse a l’ djonde. Si pezant stoumak rivtéve si pwetrene. I sinteut les dresseyès pontes di ses tetes å triviè d’ si tchmijhe.
Ele a lèvé s’ tiesse po-z atraper s’ boutche et lyi aclaper ses lepes so les sinnes. Elle estént doûces et bolantes, presses a s’ leyî ndaler, avou come ene faflote di rastinance.
Elle è fjheut di trop, et mostrer ewou k’ elle aveut schôpe.
Å moumint k’ elle a vlou passer s’ linwe inte ses lèpes, Oli l’ a rbôré. Il aveut ratrapé tote si tiesse. I n’ esteut nén reki, minme s’ elle esteut avnante, di s’ leyî moenner pa on schovion k’ i s’ åreut dné, rén k’ po s’ plaijhi. Lu, li fi del grosse cinse do Mayeur ! I n' è faleut nén rmete !
Dedja ki s’ pa aveut metou les bônes a n’ nén dispasser cwand i lyi aveut prezinter l’ feye del contesse di Monlevå : « Elle a des bins, savoz, m’ fi. Et des teres ! »
Disk’ asteure, Oli aveut todi seu tirer s’ plan avou totes ses comeres k’ i hantéve ås fiesses di viyaedje. I coreut lon et lådje po s’ plaiji, la ewou k’ on n' el rimeteut nén.
Mins vaici dins leu ståve ! On vårlet pleut abroker a tot moumint !
Cristele esteut fene rodje d’ awè stî rbôrêye. Elle aveut des ouys presse a braire di colere, des gotes k’ ele vleut rastini a tot pris.
Ene vatche a screpé l’ beton avou s’ pate di dvant. Ene deujhinme a boerlé, come po l’ ecoradjî.
Cristele s’ a ravancî, tiesse levêye, pwetrene tinkieye. I gn aveut ene plaece vude inte deus biesses. Plinne di feu, elle a poûssî Oli, et l’ adossî conte li crepe. Elle a prind s’ vizaedje dins ses mwins et l’ rabressî lepes conte lepes. Oli s’ a leyî fé. Et adon cwè ? Ci n’ esteut nin on ptit côp rade fwait ki l’ aléve mete dins les transes !
Comme on sot, il a disbotné l’ rôbe da Cristele. Il a discovrou ses vraimint belès tetes, ses lådjes et rondès spales, si vinte tot plat. Et pu, padzo, si cårpou nid d’ agaesse ki n’ ratindeut pus ki s’ moxhon.
Il l’ a rtourné, li prinde padzo ses fesses et l’ lèver po l’ ashire su l’ boird del crepe. Ké plaijhi di s’ sinte rimpli s’ coir. Lyi rinde oneur inte les coines des påjhûlès biesses. Ké fel plaijhi d’ oder s’ tinre pea d’ djonne comere !
Les ouys da Cristele estént plonkîs dins les sinnes, sins les vey. C’ est dins s’ trefond da leye k’ ele waitive et mete totes ses foices dins l’ plaijhi k’ ele sinteut monter, disk’ a piede tote rezistance. Ele s’ abandnéve, sins ritnowe, sins peu.
Oli esteut sorprins do bouneur k' i purdeut a l’ vey endaler ttossu rade, les ouys risserés asteure, ses sorcis tot froncîs, come avou ene piceye d’ anoymint. C’ est l’ inveye do viker ki tot s’ coir tchantéve dins les bresses da Oli.
I nd esteut tot mouwé. I n’ saveut pus cwè. Il a tårdjî tot d’ on côp, todi resseré inte ses djambes. Il aveut etindou on brut.
Cristele rivneut a leye et drovi s’ boke po cåzer. Mins Oli lyi a rcloyou d’ ene mwin. Ene vwès d’ comere li houkive.
Cristele et Oli ont dmoré onk dins l’ ôte sins bodjî. Cristele a stofé ene djipelreye et s’ caclindje s’ a rastrindou d’ on fel côp.
Oli l’ a rabressî, et rataker a limer påjhûlmint dins s’ coir. I s’ a leyî wangnî a s’ toû pa l’ plaijhi, on plaijhi come i nd aveut djamåy sintou.
I s’ ont rabiyî a l’ varade et prinde les saeyeas d’ laecea po les poirter a l’ laitreye.
Note Wikisourd
Ci boket ci, n’ est k’ èn arindjmint d’ on scrijhaedje e françès d’ on scrijheu d’ amon nozôtes.
Replaidî e rfondou dins l' Rantoele 97, bontins 2021.