Novèles èt Binde à dèsséns/XXVII

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou walon.
Novèles èt Binde à dèsséns

XXVII
Li vî galant da Kristèle

Vola, li dêrène florîye èsteût moduwe. Il aveût r’mètu lès sayas su l’ passadje yinte lès kus dès vatches. Lès tchèts avin’ acouru lètchî l’ chume su li d’zeû. Oli ni s’a nin soyu rasténre, il lès-a faît r’culer. Il a apicî on saya dès deûs mwins, l’ lèver pa d’zeû s’ tièsse èt bwêre li tchôd modu lacia à plin.ne goléye. Il a r’chaurbu sès lèpes. Li cène di d’zeû èsteût co machuréye di blanc.

Kristèle a abroké, rouf-rouf. Èle li razouyeûve, dès stwèles di djèriadjes boguin’ sès-ouys. Èle s’a v’nu aclaper à lî, si visadje près’ à l’ djonde. Si pèsant stoumak rifteûve si pwètrine. I sinteûve lès drèssîyès pwintes di sès tètes au trîviès d’ si tch’mije.

Èle a lèvé s’ tièsse po-z-atraper s’ bouche èt li aclaper sès lèpes su lès sènes. Élle èstin’ doûces èt bolantes, près’ à s’ lèyî d’naler, èvou come on faflote di rastinance.

Èlle è fieûve di trop, èt mostrer èwou qu’èlle aveût chôpe. Au momint qu’èlle a v’lu passer s’ linwe yinte sès lèpes, Oli l’a r’bouré. Il aveût ratrapé tote si tièsse. I n’èsteût nin rèquis, minme s’èlle èsteût avenante, di s’ lèyî min.ner pa on chovion qu’i s’areût d’né, rén qu’ po s’ plaîji. Lî, li fi dè l’grosse cinse dél Mayeûr, faleûve nin è r’mète. Dèdja qui s’ pa aveût mètu lès bones à n’ nin dispasser quand i lî aveût prusinter l’ fèye dè l’comtèsse di Monlivô :

« Èlle a dès bins, savoz m’ fi, èt dès têres… »

Djusqu’asteûre, Oli aveût todi soyu tirer s’ plan èvou totes sès coméres qu’il anteûve aus fièsses di viladje. I coureûve lon è laudje po s’ plaîji, là, èwou qu’on nè l’ rimèteûve nin. Mins véci dins leû stauve ; on vaurlèt p’leûve abroker à tot momint.

Kristèle èsteût fine rodje d’awè stî r’bouréye. Èlle aveût dès-ouys près’ à braîre di colére, dès gotes qu’èle v’leûve rastinre à tot pris.

One vatche à scrèpé l’ bèton èvou s’ pate di d’vant, one deuzyinme à beûlé, come po l’ècoradjî. Kristèle s’a ravancî, tièsse lèvéye, pwètrine tinkîye.

I-gn-aveût one place vude yinte deûs bièsses. Plin.ne di fè, èlle a poûssi Oli, èt l’adossî conte li crépe. Èlle a prind s’ visadje dins sès mwins èt l’ rabrèssî lèpes conte lèpes. Oli s’a lèyî fé. Èt adon qwè ? Ci n’èsteût nin on p’tit côp rade faît què l’aleûve mète dins lès transes ! Comme on sot, il a disbotné l’ rôbe da Kristèle. Il a discouvru sès vraîmint bèlès tètes, sès laudjes èt rondès spales, si vinte tot plat, èt pa d’zo, si cârpu nid d’agasse qui n’ ratindeût pus qui s’ mouchon. Il l’a r’tourné, l’ prinde pa d’zo sès fèsses èt l’ lèver po l’achîre su l’ bôrd dè l’crépe.

Quén plaîji di s’ sinte rimplî s’ cwârp. Li rinde oneûr yinte lès cwanes dès paujêrès bièsses. Quén fèl plaîji d’ouder s’ tinre pia d’ djon.ne comére !

Lès-ouys da Kristèle èstin’ plonkîs dins lès sènes, sins lès veûy.

C’èst dins s’ trèfond da lèye qu’èle waîteûve èt mète totes sès fwaces dins l’ plaîji qu’èle sinteût monter, djusqu’à piède tote rèsistance. Èle s’aband’neûve, sins ritnuwe, sins peû.

Oli èsteût sorprins do boneûr qu' i purdeût à l’ veûy s’ènn’aler t-t-ossi rade, lès-ouys rissèrés asteûre, sès sôrcis tot froncîs, come èvou one picîye d’anôyemint.

C’èst l’invîye do viker qui tot s’ cwârp tchanteûve dins lès brès da Oli. I ‘nn’ èsteut tot mouwé. I n’ saveût pus qwè. Il a taurdjî tot d’on côp, todi rèssèré yinte sès djambes. Il aveût ètindu on brût.

Kristèle riv’neût à lèye èt drovu s’ bouche po causer. Mins Oli li a r’clôyu d’one mwin. On vwès d’ comére l’ ukeûve. Kristèle èt Oli ont d’moré l’onk dins l’ôte sins boudjî. Kristèle a stofé one djipèlerîye èt s’ caclindje s’a rastrindu d’on fèl côp. Oli l’a rabrèssî, èt rataquer à limer paujêremint dins s’ cwârp. I s’a lèyî gangnî à s’ toû pa l’ plaîji, on plaîji come i ‘nn’ aveût jamaîs sintî.

I s’ont rabiyî à l’va rade èt prinde lès sayas d’ lacia po lès pwârter à l’laîterîye.



Note Wikisourd

Ci bokèt ci, n’èst qu’on’ arindjemint d’on scrîjadje è françès d’on scrîjeû d’amon nos-ôtes.

Cist eplaidaedje cial a rcandjî sacwants ptitès måcules dimorêyes e mwaisse tecse so papî.

Ciste ouve cial est eplaideye so Wikisourd dizo l’ licince : Creative Commons Attribution-ShareAlike 3.0 Unported.