Noveles et binde ås desséns/XXII

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller (rifondant namurwès).
Noveles et binde ås desséns, 2020
Li Rantoele, 2018

XXII
Li grosse vatche

C’ esteut å bontins. Li solea lujheut dins on bleu stoelî sins nûlêye. Dj’ esteu bén luné et dji m’ a-st arindjî po ndaler fé on toû a velo.

Dji pezéve dissu mes pedales, tot binåjhe. Dj’ esteu minme ewaeré d’ m’ etinde tchanter.

Dj’ a tårdjî po m’ ripoizer et rprinde alinne. Dj’ a ståré m’ velo dins l’ fossé. Dji m’ î a ashî, tot djusse divant l’ bouriket pa wou k’ on pout prinde li pî-sinte ki vos ramoenne fén roed dins l’ vijhnåve, et ki côpe a deus li cloteure di ronxhes do pré des vatches.

Dins l’ paxhi, tot djusse pa dvant mi, ene bele foite BBW (Bleuwe Blanke Walone) a rlevé s’ mouzon foû des yebes, avou l’ air di m’ dire : « Cwè vouss, twè ? » Al tete, on vea co mia tourné k’ leye, on cou d’ polén, fougnive dins s’ pé.

Dji m’ a lancî et lyi oizeur låtchî ene marimince : « Maria todi, ki t’ es bele avou tes deus djaenes pindants agriftés a tes orayes ! »

« Ti troves ça bea, t’-minme, po on dmey cougnî ? » k’ ele m’ a respondou so ses grands tchvås. « Ti voereus t’ feme avou deus pareys djaenes clicoteas et on caraco dispwairyî, ti trovreus ça bea, twè ? Låvå a l’ Urope a Brussele, ci n’ est k’ des bådets, i n’ ont nén waitî al coleur di m’ rôbe ! I m’ ont moussî come on spawta ! »

Ene vatche ki berdele avou tote si tiesse ; c’ esteut ddja sbarant, mins ene ki fwait del politike, ça, dji n’ aveu co djamåy veyou, ni etindou dire ! Dj’ a dmoré ene hapêye, tot paf d’ astampé, divant d’ lyi poleur responde.

« Oyi, vos serîz bén dins l’ bon, mins vos clicoteas, c’ est come nosse cwåte d’ indintité da nos, et ça, c’ est l’ vosse ! On sait d’ ewou k’ vos vnoz, kî çk’ est vosse pa, vosse man. Al kéne cinse ewou k’ vs avoz skepyî. Avou vos djaenes pindants, vos ploz voyaedjî dins tos les payis, on sarè todi kî ki vs estoz ! »

« Ti djowes avou mes aburtales, hê, twè ? Dji sereu libe la, ey awè des abondroets come les vatches di l’ Inde, et m’ poleur pormoenner pattavå les tchamps. Ti voes bén ki dj’ so resserêye dins on paxhi, et cwand ç’ n’ est nén pa des fis d’ årca, c’ est pa on filé ki t’ dene ene drine a tchaeke côp ki dj’ passe mi tiesse trop lon. Ça sieve a cwè tot ça ? Mel pôreuss dire ? »

Dj’ a begyî : « Po nozôtes, les omes, çou ki conte, c’ est d’ sawè del kéne sôre di vatche ki vs estoz. Si vs estoz ene vatche po l’ laecea, ou ene po l’ tchå ! »

« Comint mi oizes tu rmete a totes ces sôres di biesses ki vegnnut d’ abaguer dins nosse payis ? Des Limozenes del France ; ni cou, ni panse, ni tete; des Hostines då Canada, ki n’ ont ki l’ pea dsu leus oxheas. Des vraiyès båre ås boles. Dji m’ dimande todi bén comint k’ nos toreas polnut griper ladsu, saiss, mi. Mi vijene mel dijheut co l’ ôte djoû : « Mi feye, i gn a des cis, ene gade avou on cindrén, i griprént dsu. » Ça n’ mi sbare nén k’ les årtisses ont-st emantchî l’ fås cougnaedje ! »

Elle a rataké : « Waite mu bén, ti n’ mi såreus rmete a ces carcasses la d’ etrindjires ? »

Vos l’ savoz eto, ki les vatches sont foirts delicates.

Po l’ rapåjhî ene miete – ca t’ åreus yeu dit ene ki n’ aveut nén rwaitî s’ botroûle divant d’ si rlever, dji lyi a fwait les cwanses del vey voltî.

« Nonna, m’ bele BBB, c’ est vos l’ pus bele, vos, l’ pus grosse, vos ki nos fwait les meyeus veas. C’ est vosse prumî ? »

« Meu nonna, c’ est ddja m’ troejhinme, li cinsî a vnou cweri les deus prumîs a camion po ls emoenner dji n’ sai wou, mes pôves efants ! »

Dji lyi a dmandé s’ no. « El cinsî m’ lome Maggie » m’ a-t ele respondou. I m’ a shonné k’ dj’ aveu ddja etindou ç’ no la kéke pårt.

Ele s’ a leyî rivni a leye, s' ashide so l' yebe et, buk a buk, m’ atôtchî platezak.

« Mins si vos creyoz k’ c’ est l’ pompon d’ poirter des djaenes plastrons come ces-la a vos orayes, pocwè k’ vos n’ è poirtez nén, vozôtes, les djins ? Vos croejhelrîz ene comere, vos sårîz direk, kî çk’ elle est, rén k’ a lére cwè so ses clicoteas. Bondjoû madame, vs estoz 45 ans viye, vosse pea est blanke ôrlêye pa l’ solea, vs avoz yeu cwate efants avou cwate diferins omes ki vos paynut po-z etertini tchaeke leu djonne, et vs estoz novelmint presse po rataker l’ cénkinme.

A ! Et por vos, nosse dame, ci serè cwè ? Dji voe k’ vosse pea est noere, ki vs estoz costri, ki vs estoz 50 ans viye, ki vs avoz catoize efants å Zimbabwé, presses a potchî evoye did la po vni dins nosse payis, ki vs avoz corou evoye do radjoû d’ Sangate ! Vola, les prezintaedjes sont fwait ! »

Dj’ esteu storné so l’ côp ! Ele ni s’ contintéve nén d’ cåzer, elle aveut tote si tiesse po fé l’ luçon ås omes !

Dj’ a rprins m’ velo. Dji lyi a dit : « A onk di ces djoûs », et a s’ vea eto. I m’ a shonné k’ ele aveut l’ air di s’ fote di m’ binete, po l’ paskeye k’ ele vineut di m’ djouwer.

Tot rabrokant, dj’ a tuzé a çk’ ele meteut so l’ tåve. Tot conté tot rabatou, est çki ç’ sereut si sbarant k’ ça po les djins ? Bén seur, ådjourdu, avou les novelès machenes, on-z åreut co rade candjî les pindants po des tîcheures electronikes ewou k’ on î pôreut lére tot çki nos avans dins nosse tiesse. Pus moyin d’ raconter des crakes. Pus dandjî d’ clignetes. Rén k’ e vos croejhlant, on såreut çou k’ vos avoz e l’ tiesse. Si vos berdelez dins l’ posse ås imådjes, on såreut d’ avance ki vs racontez des faloûtes po neyî l’ pexhon.

« A ! On vos lome Jule. Come mi, mins dji so pus foirt ki vos. » « A ! Vos veyoz voltî m’ tchapea ! Merci bråmint des côps, mi c’ est vosse sitoumak ki m’ plait bén ! » « A ! Vos-estoz tchampete ! Bén mi, la ki dj’ vén d’ moussî foû pa l’ grand poite del prijhon. Si vs alez a hintche, dj’ irè a droete. Nén dandjî d’ vos tracassî avou mi ! Dji n’ so nén malåjhey, savoz ! » « A ! Vos estoz tote peneuse ! I gn a ene sacwè ki n’ va nén ? Dijhoz m’ on pô ? »

C’ est bén les prouves ki c’ est les vatches ki fwaiynut avancî les omes. Pus djamåy vos n’ rawaitroz les vatches avou vos ouys come divant. Dji sereu del Comission, dji lyi dene direk li pris Nobel, mi, a ç’ Maggie la !

Drole di sôres di djins, les omes, ki fwaiynut sopoirter ås ôtès biesses totès mariminces k’ i n’ sopoitrént nén por zels.



Notes Wikisourd

sicrît so ene idêye da Jules Mazy; dedja eplaidî erfondou e l' Rantoele l° 85 (bontins 2018).