A Viyance, diviè 1750, on mestré aveut vnou po djouwer des danses ås djins do tchestea…
I.
Nosse mere nos l' aveut bén dit
D' nos dmefiyî d' lu.
Trop vayant po-z esse oniesse
Les omes, c' est mo traite
Trop bén moussî po s' mestî,
Lu ki s' dit mestré.
Vo l' la avou s' doûce alinne
Ki dit : « Mi ptite rinne,
Vinoz vs pormoenner e bwès
Avou mi k' est Fåminwès. »
II.
Nosse mere nos l' aveut bén dit
D' nos dmefiyî d' lu.
Por mi, Bure et Lesterni,
C' est payis d' Tchini.
S' apinsèt les Fåminwès
Vozôtes, Årdinwès,
Vs estoz des magneus d' crompires
Ki vnèt inte les pires,
Vs estoz des magneus d' coirbås
Gåre ås efants d' Atrivå.
III.
Nosse mere nos l' aveut bén dit
D' nos dmefiyî d' lu.
Dji n' l' a nén volou schoûter :
Çou k' c' est, d' esse mactêye !
Dj' a don prins l' tene et l' såvlon.
Cour ås Wés d' Bouyon
Fé shonnance d' aler al bouwêye;
L' ratinde al passêye
Rade muchyî l' tene et l' bouwêye
Et s' moussî e l' viye virêye.
IV.
Nosse mere nos l' aveut bén dit
D' nos dmefiyî d' lu.
I cåzéve come on mårlî.
Lu ki s' dit mestré.
‘L aveut rôlé tocosté
Sca houte di Nouvié.
Por mi, Stegne et Lesterni,
C' est payis d' Tchini.
Dji n' conoxhe ki l' pré Douni
K' est fén griblé d' fleurs d' avri.
V.
Nosse mere nos l' aveut bén dit
D' nos dmefiyî d' lu.
Al fleur ki n' est nén d' avri
Gn a ene pitite soris
K' a vnou ramxhî di ttåtoû
Forguene li mwin d' vroûl.
Dj' a seu k' c' est avou l' pepion
Ki l' comere a bon,
Mi k' n' aveut cnoxhou d' plaijhi
K' d' aveur del tchå po midi.
VI.
Nosse mere nos l' aveut bén dit
D' nos dmefiyî d' lu.
Dj' a co sintou ds ôtes cayets
Sins k' dji n' voeye bén cwè
Après, dj' a co rxhorbou m' boke
Et dj' a rnetyî l' rodje
K' aveut tot anichté m' cote
D' wice ki ça sôrtixh ?
I m' a bén dit di n' rén dire
Oubén k' ça m' costêyreut tchir.
VII.
Nosse mere nos l' aveut bén dit
D' nos dmefiyî d' lu.
Dji n' l' a nén volou schoûter :
Çou k' c' est d' esse mactêye !
Li londmwin, esteut å diåle
Va-z è vey wice, diåle !
Li trô d' l' eglijhe esteut vude
L' bea tins esteut houte
Mi k' creyeu k' les beas mousmints
N' alént k' avou bounès djins.
VIII.
Nosse mere nos l' aveut bén dit
D' nos dmefiyî d' lu.
Dji n' l' a nén volou schoûter :
Çou k' c' est d' esse mactêye !
L' samwinne ki dji n' m' a nén rveu
Dji n' a nén ddja seu
K' cwand k' on n' a pus ses parints,
C' est don k' on ratind.
Mins cwand ç' a stî po dabôrd
Il a falou k' dji m' rassonre.
IX.
Nosse mére nos l' aveut bén dit
D' nos dmefiyî d' lu.
Dji m' rassonre; c' est po dmander
Dmander po m' maryî
A on vî ome ki spozreut
Li gade et l' gadot.
Dj' aveu des royes a mes coines
Et asteure, i m' shonne
Ki l' plaijhi del viye virêye
N' è våt nén totes les kerwêyes !
eplaidî so l' Aberteke avou on ptit motlî; riscrît cial avou kékes pitits candjmints.