À Viance, duvè 1750, in mèstrî avot v'nu pou djouwer dès danses aus djins du tchèstê…
I.
Nosse mére nous l'avot bin dit
Du nous d'mèfier d' li.
Trop vayant pou-z-èsse onête
Lès-omes, c'èst mou trête
Trop bin moussî pou s' mustî,
Li ki s' dit mèstrî.
Vou l' là avu s' doûce alin.ne
Qui dit : « Ma p'tite rin.ne,
Vinez v' porminè o bwès
Avou mi qu'èst Fauminwès. »
II.
Nosse mére nous l'avot bin dit
Du nous d'mèfier d' li.
Pour mi, Bûre èt Lèstèrni,
C'èst payis d' Tchini.
S'apinsèt lès Fauminwès
Vos-ôtes, Ârdinwès,
Z'astèz dès mougneûs d' crompîres
Qui v'nèt inte lès pîres,
Z'astèz dès mougneûs d' cwârbôs
Gâre aus-èfants d' Atrivau.
III.
Nosse mére nous l'avot bin dit
Du nous d'mèfier d' li.
Dju n' l'ê nin volu choûter :
Cè k' c'èst, d'èsse maktée !
Dj'ê pris la tine èt l' sauvlon.
Coûr′ aus Wés d' Bouyon
Fé san.nance d'aler al bwêye,
L' ratinde al passêye;
Muchier la tine èt la bwêye
Èt s' mousser al vîe virêye.
IV.
Nosse mére nous l'avot bin dit
Du nous d'mèfier d' li.
I cauzot come in maurlî.
Li ki s' dit mèstrî.
‘L avot roûlé tous costés
Jusk'oûte du Nûvier.
Pour mi, Stègne èt Lèstèrni,
C'èst payis d' Tchini.
Dju n' counus quu l' pré Douni
Qu'est fin griblé d' fleûrs d'avri.
V.
Nosse mére nous l'avot bin dit
Du nous d'mèfier d' li.
Al fleûr qui n'èst nin d'avri
Gn è ène pitite sèris
Qu' è v'nu ramechier du t't autoûr;
Fourguine la mwin d' vloûrs.
Dj'ê seû qu' c'è-st-avu l' pèpion
Qu' la fame avot bon,
Mi qu' n'avot counu d' plêji
Qu' d'awè dul tchaur pou mîdi.
VI.
Nosse mére nous l'avot bin dit
Du nous d'mèfier d' li.
Dj'ê co sintu d's-ôtes cayèts
Sins qu' dju n' wèche bin cwè.
Après, dj'ê r'choûrbu ma boutche
Èt dj'ê rnètché l' roudje
Qu'avot anichté ma cote
Du d'dû ç' quu ça sorte ?
I m'è bin dit du n' rin dîre
Ûdonbin qu' ça m' coustrot tchîr.
VII.
Nosse mére nous l'avot bin dit
Du nous d'mèfier d' li.
Dju n' l'ê nin volu choûter
Cè qu' c'èst d'èsse mak'tée !
Lu londmwin, ‘l astot au djâle
Va-z-è vèy d'û, djâle !
Lu trô d' l'èglîje astot voûde.
L' bê timps astot oûte.
Mi qu' crwayot k' lès bês mous'mints
N'alint k'avu lès bones djins.
VIII.
Nosse mére nous l'avot bin dit
Du nous d'mèfier d' li.
Dju n' l'ê nin volu choûter
Cè qu' c'èst d'èsse mak'tée !
La s'mwin.ne quu dju n' m'ê ni r'veû
Dju n' ê nin co seû
Qu' quand on n'è pus sès parints
C'èst don qu'on ratind
Mês quand c'è sté pou d'abôrd
Il è falu qu' dju m' rassonre.
IX.
Nosse mére nous l'avot bin dit
Du nous d'mèfier d' li.
Dju m' rassonre, c'èst pou d'mander
D'mander pou m' marier
A in vî ome ki spoûz'rot
La gade èt l' gadot.
Dj'avos dès rôyes a mès cwan.nes
Èt asteûre, i m' san.ne
Quu l' plêji dul vîe vîrêye
N'è vaut nin toutes lès kèrwêyes !
signé « Louline Vôye, sicrît a M'diq ou mwès d' jun 1984 »; eplaidî so l' Aberteke avu in p'tit motlî; rumètu ciddé come la prèmîre modêye (pûr accint d' Transine), èt avu l' bon pîtadje.