Mu mére èt m’fèye

Livre d'or Charles Steenebruggen, 1936

Mu mére èt m’fèye

Volà dèdja longtimps du cisse matinêye-là !
I-aveût nîvé dèl nut′, i djaléve à pîre-finde,
Qwand lu neûr côrbillârd avou m' mére ènn'ala.
Volà dèdja longtimps du cisse matinêye-là !
Portant, mére, åtoû d' mi, dju creû todi v's'ètinde.

Est-ce bé veûr qu'i n' dumant ré d' nos autes après l'mwêrt ?
Qwand, erî onc du l'aute, è pleine djôye, ile nos råye,
Tot sèreût donC fini ? Nos n'årîs n'årîz nol espwèr ?
Est-ce bé veûr qu'i n' dumant ré d' nos autes après l'mwêrt ?
Mére ? Nu r'vint-on måy' pus qwan on-z a passé l'håye ?

Qwand dju sofeure, i m'sôle quu v's èstez là, portant ;
I m'sôle ètinde vosse vwès come qwand vos m'fîz mamèye
Et quu vos m'sutrindîz so vosse coûr tot m'båhant
Qwand dju sofeure, i m'sôle quu v's èstez là, portant :
Dju r'veû vosse bon visèdje èt d'on côp dj'm'apåhtêye.

Et dju m'dis qu'vosse bèle åme èst d'hindawe è mi-èfant
Qwand mu p'tite fèye rupwèse è sès blankès djèrnêyes.
Et, qwand sès deûs grands oûys mu loukèt tot riyant
Et dju m'dis qu'vosse bèle åme èst d'hindawe è mi-èfant
Po raveûr, à vosse tour, çou qu'dju v'deû d'fièstirèyes.