Vinez, Marèye, i lût l’ bêté ;
oyez-v’ lès råskinioûs tchanter
avå totes lès prêrèyes ?
On ode lès rôses qui sont florèyes ;
I fêt påhûle po tos costés ;
vinez, Marèye !
Vinez, Marèye, è cråmignon ;
dji sé dès si bèlès tchansons
qu’i n’a nin dès parèyes.
Djans don ! vinez, pusqu’on v’s-è prèye ;
hay ! ni fez nin tant dès façons ;
vinez, Marèye !
Vinez, Marèye ! mi soûr Èli,
Îdå, Dadite èt m’ fré Hinri
vont co fé d’ leûs sot’rèyes :
hoûtez dèdjà quéle vicårèye
i minèt tot-avå l’ corti !
Vinez, Marèye.
Vinez, Marèye, on bê valèt
vôreût bin v’ gruziner ’ne saqwè
tot bas, cial à l’orèye.
Loukîz !… volà dèdjà qu’èle rèye !
Èle radjustêye si bonikèt :
vocial Marèye !
Li tecse est oyåve cial, prononçaedje del mwaisse modêye, avou acpagnmint.