Èle tchante è m’ coûr et d’vins mi-orèye
Lu walone tchanson du m’ payis.
Noule pârt dju n’ ètinda l’ parèye
Noule come lèy nu pout m’ahâyî
On dîreût l’ ramadje do prétimps
On riya du djônès fèm’rèyes
S’ acwardant l’ dîmègne â matin
Al houkâye d’ one distante son’rèye (2 côps)
II.
C’ èst l’ plinte do l’ Wâtche èzès rochers
Èt sès djoupes d’ aveûr vinki l’ vène
Lu brûtinadje do rû o l’ hé
Èt les clérès games do l’ Wartchène
Èt s’ i lî prind d’ groûler tél’fî
Èt d’ s’ èmonter avou l’ mâle bîhe
Qu’ assofèle do wèrahe payis
I n’ lî dure quu l’ valeûr d’ one brîje (2 côps)
III.
Rapêh’tée, èle èst l’ tchant d’ l’ oûhê
Lu son d’ one cloke bérçant l’ sofrance
Èle èst tofèr èzès cohês
Lu fièstihante vwas do vint d’ France.
Insi tchante-t-èle duvins mi-orèye
Lu walone tchanson du m’ payis.
Noule pârt dju n’ ètinda l’ parèye
Noule come lèy nu pout m’ahâyî (2 côps)
Eplaideye aprume li 22 d' may 1926 dins « La Semaine »